Aalakoorlutik biilertut 136-t siorna tigusarineqartut
Inuit 136-t aalakoorlutik biilertut 2016-imi tigusarineqarsimapput. Nunatsinni Politiit kisitsisinik saqqummiussaat nutaat taama takussutissiipput.
Allattoq Simon Uldum -
Taakkunannga suliat 87-it aalajangiiffigineqareersimapput akiligassiissutigineqartullu tamarmiusut 1,1 millionit koruuninik amerlatigipput. Suliat sinneri suli aalajangiiffigineqarsimanngillat. Nunatsinni Politiit Facebookimi taama allaaserisaqarput.
Agguaqatigiissillugu 12.700 koruunit missaannik akiligassiisoqartarpoq, taamaammat 2016-imi akiligassiissutigineqartut tamarmiusut 1,5 millionit koruunit missaanniissasut, politiit ilisimatitsissutigaat.
Akiligassiissutigineqartut danskit naalagaaffiata karsianut ingerlateqqinneqartarput.