Aajap qallunaat aningaasaqarnermut ministeriat tuavisaarpaa

Aningaasaqarnermut naalakkersuisup Claus Hjort Frederiksenip Aaja Chemnitz LArsen aggersassallugu ersarissumik neriorsorsimavaa. Maannamulli suli ataatsimeeqatigiissimanngillat. Taamaattumik Aaja Chemnitz Larsen maanna Claus Hjort Fredriksenimut nukingisaarutinik allagaqarsimalluni KNR-imut oqaluttuarpoq.
Claus Hjort Frederiksen aningaasanut inatsisissaq pillugu suli isumaqatigiinniariartoqqusinngimmat, Aaja Chemnitz Larsenip qungujulajunnaaqqavoq. Assi © : Steen Brogaard/ft.dk
oktobarip 30-at 2015 14:34
Nutserisoq Erna Lynge

 

Inuit Ataqatigiit Folketingimi ilaasortaatitaata Aaja Chemnitz Larsenip maanna danskit aningaasaqarnermut ministeriat tuavisaarpaa, aappaagu aningaasanut inatsisissaq pillugu ataatsimeeqatiseralugu. 

Taamaaliorpoq partii aningaasanut naalakkersuisoqarfimmut suli aggersarneqarsimanngimmat, naak Folketingimi partiit arlaqartut aggersarneqarsimagaluartut.

Aamma atuaruk Aajap Aleqallu suleqatigiillutik eqqartuussiveqarnermi pissanngorsaanissaq sulissutiginiarpaa

Aggustili qaammataagaa Aaja Chemnitz Larsenip Inuit Ataqatigiinneersup uparuarsimavaa, aappaagumut aningaasanut inatsisissaq pillugu ataatsimeeqateqarusulluni.

Folketingimi aningaasanut inatsisissap siullermeerneqarnerani politikerip Inuit Ataqatigiinneersup sapaatip akunnerata siuliani oqaluttarfimmiit erseqqissarpaa, aningaasaqarnermut ministeri peqatigalugu suliassat arlaqartut Kalaallit Nunaannut tunngasut pillugit aningaasanut naalakkersuisoq oqaloqatigerusullugu.

- Paasinarpoq naalakkersunngoqqammigamik suliassamik iserfiginiarnissaannut piffissaqartariaqarmata, pakatsinarporli tusagassiuutit aqqutigalugit tusarlugu aningaasanut inatsisissaq pillugu maanna partiit tamarmik aggersarneqareersimasut, naak isumaqatigiinniarnernut kalaallit folketingimut ilaasortat qaaqquneqarsimanngikkaluartut, Aaja Chemnitz Larsen KNR-imut allagaqarpoq ilanngullugulu oqarluni:

- Neriuppunga tamanna ima isumaqassanngitsoq Kalaallit Nunaat tulleriiaarinermi puigorneqarsimasoq, politikeri Inuit Ataqatigiinneersoq oqarpoq.

Aamma atuaruk Aningaasanut inatsisissap isumaqatigiinniutigineqarneranut peqataatinneqarnissaq IA-p piumasaqaatigigaa

Aammattaaq Siumut suli aggersarneqarsimanngilaq. Aleqa Hammond nalunaarpoq sapaatip akunnerata naanerani susoqanngippat ataasinngorpat ministeri ataatsimeeqatiseriniarlugu.

Siorna naalakkersuisuusut S aamma R aningaasanut inatsisissamik isumaqatigiissuteqarput,  ilaasortat Nunatsinneersut isumaqatigiinniaqatiginagilluunniit. Aningaasaqarnermut naalakkersuisoqarfik taamani nalunaarpoq Inatsisartunut qinersinissaq pissutigalugu kalaallit folketingimut ilaasortat ataatsimeeqatiserinissaat kinguartinneqarsimasoq.