PITUFFIK Aajap kiffartuussinissamut suliarinnittussarsiornermi piumasaqaatit apersuutigai
- Amerikamiut suliffeqarfiutaat Pituffimmi kiffartuussinissamik isumaqatigiissusiorsinnaappata ajorpoq, kiffartuussinissamimmi isumaqatigiissut inuiaqatigiinnut kalaallinut toqqaannartumik iluaqutaasussaavoq.
Folketingimut ilaasortaq Aaja Chemnitz Larsen tusagassiuutinut nalunaarummi ilaatigut allappoq. Taassuma Pituffimmi suliassat Amerikamiut suliffeqarfiutaannut Exelisimut suliakkiutigineqarnerat innersuussutigaa.
tamatumunnga atatillugu suleqatigiissitanik marlunnik pilersitsisoqarpoq, taakkua suliariumannittussarsiuussinermik piumasaqaatinik oqaasertalersuisussaallutik.
- Maannamullu sumilluunniit tusagaqanngilagut, Aaja Chemnitz Larsen allappoq.
Aamma atuaruk Pituffik pillugu nalunaarusiap imarisai paasineqartussanngorput
Taanna danskit nunanut allanut tunngasunut ministeriannut Kristian Jensenimut arlalinnik maanna apeqquteqaqqippoq.
Suleqatigiissitanut marlunnut suut suliakkiutaanersut kikkullu suleqatigiissitaniinnersut apeqquteqaammini nassuiaqquaa.
Suliami Pituffimmut tunngasumi pisut tulleriiaarneri pillugit eqqartuussissuserisup Ole Spiermannip nassuiaataa tamanut ullumikkut saqqummiunneqalersorlu, Aaja Chemnitz Larsen taamannak saqqummiussivoq.
Aamma atuaruk Suliariumannittussarsiuussinermut malittarisassat nutaat Namminersorlutik Oqartussat akuerisimavaat
Tassami allagaatit pisunut tunngasut KNR-imit takujumaneqarnerat ullumi akuersaassallugu Namminersorlutik Oqartussat ippassaq pingasunngornermi nalunaarput.
Kiffartuussinissamik isumaqatigiissut maannamut kalaallit danskilluunniit suliffeqarfiutaannut tunniuneqartaraluarpoq. Kisianni suliariumannittussarsiuussinermi oqaasertat allanngortinneqarmata, suliassaq aningaasarsissutaasaqisoq suliffeqarfiut Amerikamiut pigisaata, Danmarkimi nalunaarsorneqarsimasup, pissarsiareriataarpaa.
Oqaasertat nutaat Nunatsinnit misissorneqarput Nunatsinnillu akuerineqarsimarpasillutik, kisianni nunatsinni arlaannaalluunniit akisussaaajumanngilaq.
- Piumasaqaatit siulliit, Amerikamiut suliffeqarfiutaata Pituffimmi kiffartuussinissamik isumaqatigiissuteqarneranik kinguneqarput. Naatsersuutigaara oqaasertaliussassat ima ersaritsigissasut allaat paatsuugassaanatik, Aaja Chemnitz Larsen allappoq.
