Aaja Chemnitz marlunnik ilaasortaaffeqarnermini millionit sinnerlugit isertitaqalissaaq
Inuit Ataqatigiimmi nuimasortaasa ilaat Aaja Chemnitz Larsen marlunnik ilaasortaaffeqalertussanngorpoq.
Ane Hansen Kommune Qeqertalinngortussami ukiortaamiit borgmesterinngortussanngorami Inatsisartuni ilaasortaaffimminit sulinngiffeqarallartussanngortoq partiimit ullumi sisamanngornermi nalunaarutigineqarpoq.
Aaja Chemnitz Larsenip marlunnik ilaasortaaffeqalernermini sulinerulertussaagaluarluni aningaasarsilluartarnissani qilanaarutigiinnarsinnaavaa.
AAMMA ATUARUK Aajap Ane Hansen taarseraa
Folketingimi ilaasortat qaammammut 51.358 koruuninik akileraarut suli ilanngaatiginagu aningaasarsisarput. Taakku saniatigut tapi akileraarutaasussaanngitsoq 5.047 koruuni qaammatit tamaasa akissarsiaannut ilaasarpoq.
Inatsisartunili akissarsiakinnerulaarput. Inatsisartuni ilaasortat 31-usut qaammammut 41.854 koruuninik akileraarut suli ilanngaatiginagu aningaasarsisarput.
Aaja Chemnitz Larsenip ukiumut 1,1 mio. koruuninik aningaasarsisalernissani KNR-imut sisamanngornermi ualisoq annertunerusumik oqaaseqarfigerusunngilaa.
- Folketingimi Inatsisartunilu aningaasarsiat innersuussutigiinnassavakka. Annertunerusumik oqaasissaqanngilanga, taama oqarpoq, imali itisiliilluni.
- Politikkikkut sulinera aningaasarsianik aallaaveqanngilaq. Taamaanngisaannarsimavoq, siunissamilu taamaalinngisaannartussaalluni.