Assi: Maasi Pedersen/KNR

Folketingimut qinersineq 2015 Aaja aamma Aleqa Lars Løkkemik oqaloqateqarput

Lars Løkke Rasmussenip naalakkersuisunngortitsiniarnerani nunatsinnit folketingemut ilaasortaatitat sumi inissisimanertik saqqummiuppaat. Siumut teknikikkut Socialdemokraatinik suleqateqarnertik aalajangiusimavaat. IA Lars Løkkemut piumasaqaatinik saqqummiussipput.

Nunatsinnit folketingemut qinigaasut Aleqa Hammond aamma Aaja Chemnitz Larsen Venstret siulittaasuannik
Lars Løkke Rasmussenimik ullaap tungaani oqaloqateqarput.

Danmarkimi naalakkersuisunngortitsiniarluni isumaqatigiinniarnermut atatillugu Aleqa Hammond aamma Aaja Chemnitz Larsen oqaloqatigineqarput.

Danmarkimi partiit assigiinngitsut  Lars Løkke Rasmussenimik ippassaq oqaloqateqarput, Lars Løkke Danmarkimi naalakkersuisunngortitsinissamik suliaqarpoq.
Ullumikkullu kalaallit nunaanni savalimmiunilu folketingemut ilaasortanngortunik oqaloqateqarluni.

Lars Løkke Rasmusen oqaluukkuminartutut tusarnaarluartutullu paasillugu, Inuit Ataqatigiti folketingemut ilaasortaatitaata Aaja Chemnitz Larsenip oqaatigaa.

Lars Løkke Rasmusenimik oqaloqateqarnermini naqissuserpaa,  Inuit Ataqatgiit danskit partiivinik aalajangersimasumik suleqateqarnissamik kissaateqanngimmata, partiimilli anguneqartussatut kissaatigineqartut  saqqummiussimallugit.

- Danskit partiivinik aalajangersimasumik suleqateqarniarnata aalajajangiusimavarput.
 Suliniutiginiakkanik arlalinnik saqqummiussassaqarpugut.

Pinerluttunik isumaginnittoqarfik aamma illersornissamut tunngassuteqartunik isumaqatiginiarnissamut peqataniarpugut, tassalu Lars Løkke Rasmussenimik oqaloqateqarninni taakkua taavakka, Aaja Chemnitz Larsen oqarpoq.

Taassuma erseqqissaatigaa, danskit naalakkersuisunngortitsiniarneranni dansk folkepartii aalajangiisuusussatut inissisinerat pissutigalugu naalakkersuisunngortitsinissamut tapersuisinnaanatik,  Dansk Folkepartiip Kalaallit Nunaata Namminersortuunera ataqqinngimmagu.

Danskit naalakkersuisuinik toqqaareerpata talerperliit saamerliilluunniit tapersersussanerlugit IA-p alajangissavaa.

-  Naalakkersuisunngortitsisoqareerpat sorliit tapersersussanerlugit aalajangissaanga, taassuma saniatigut allanik oqaaseqarsinnaanngilanga, Aaja Chemnitz Larsen oqarpoq.

Aleqa Hammond Lars Løkke Rasmussenimik oqaloqateqarnini iluarisimaaarpaa.  Lars Løkkemullu erseqqissaatigaa,  Siumup Socialdemokraatit  teknikkkikkut suleqateqarnerat aalajangiusimaneqarmat.
Talerperliit ajugaanerat Siumumit ataqqineqartoq Lars Løkke Rasmussenimut erseqqissaatigineqartoq Aleqa Hammond oqarpoq.


- Siumut saamerlernik illersuisuuvoq aamma Socialdemokraatinik teknikkikkut suleqatigiittarnerat pitsaasuusoq
 erseqqissaaassutigalugu ingerlateqqinneqarnissaa taassumalu siunnerfigineqarnissaa Lars Løkke Rasmussenimut erseqqissaatigaarput, Aleqa Hammond oqarpoq

Partiit naalakkersuisunngortinneqartussat suleqatigiluinnarnissaat anguniarneqarumaartoq Aleqa Hammond oqarpoq.

- Pingaaruteqarpoq uani oqaloqatigiinnermi piumasaqaataannaat aallaaviussanngitsut kisiannili suleqatigiissutigineqarsinnaasut suuneri ammaffigigatsigit, isumaqatigiippugut inerniliinertaqanngitsumik oqaloqatigiinerput isigineqartariaqartoq, isumaqatigiippugullu ulluni tullerni oqaloqatigiissasugut aamma Købehavnemut pingasunngorpat tikikkuma oqaloqatigeeqqissasugut, Aleqa Hammond oqarpoq.
 

Lars Løkke Rasmussen akunnerit ikittunnguit matuma siorna nalunaarutigaa, talerperlernik amerlanerussuteqartunik, tassalu Dansk Folkepartiinik, Liberal Alliancenik aamma Konservatiivinik naalakkersuisunngortitsiniarneq iluatsissimanngitsoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!