9/11-mi ajunaartut aqqi ukiut 16-it qaangiunnerini suli atuarneqartarput
New Yorkimi 2001-imi septembarip aqqarngani peqqarniisaarniartoqarnerani ajunaartut eqqaaniarlugit amerikamiut tuusintilippassuit Ground Zeromi katersuunnissaat ilimagineqarpoq.
Peqqarniisaarniartoqarneranit ullumi ataasinngornermi ukiut 16-it qaangiupput. Qimagaasut, aniguisut, annaassiniartartut allallu ukiumoortumik eqqaaniaanissamut katersuunnissaat ilimagineqarpoq.
Peqqarniisaarniartoqarnerani ajunaartut aqqisa atuarneqartarnerat, nipaallisimaartoqartarnera, siarnginik sianertoqartarnera kiisalu unnuaq naallugu qilammut qaamanernik marlunnik seqertitsisoqartarnera ileqquuvoq.
Eqqaaniaaneq qimagaasunit suli pingaartinneqartupilussuuvoq.
- 9/11-mi ajunaartut eqqaaniarneqartarnerisa ingerlatiinnarneqarneranut, ajunaartullu aqqisa atuarnissaannut immikkut pisinnaatitaanera pillugu New York qujassuteqarfigerusuppara, Judy Bram Murphy, uiminik annaasaqarsimasoq siorna taama oqarpoq.
Amerikamiut præsidentiata Donald Trumpip eqqaaniaaneq USA-mi præsidentitut siullerpaamik peqataaffigissavaa.
Piffissami timmisartorsuup World Trade Centerimut apornerata nalerpiaani nipaallisimaaqatigiinnermut nulianilu Melania Trump peqataanissaa pilersaarutaavoq. Aamma USA-mi illersornissamut ministereqarfimmi Pentagonimi eqqaaniaanermi peqataasussaavoq.
New Yorkimi eqqaaniaaneq nunatsinni nalunaaqutaq malillugu nal 10.46 aallartissaaq. Timmisartorsuup New Yorkimi World Trade Centerip napasuliarsuata aappaanut aportinneqarneranit ukiut 16-erpiaat qaangiupput.
Napasuliarsuit assigiit marluusut toqqavigisimasaanni Ground Zeromi sanaartorneq suli naammassinngilaq. Napasuliarsuit allaffeqarfiusussat sisamaasut pingajuata aappaagu ammarneqarnissaa pilersaarutigineqarpoq. Aamma Grækerit oqaluffiat nutaaq aappagu ammarneqassaaq.
Peqqarniisaarniat al-Qaedameersut 19-it USA-mi timmisartorsuarnik tiguaallutik saassussineranni inuit 3000-ingajaat ajunaarput.
Timmisartorsuit marluk World Trade Centerimut aportinneqarput, ataaseq Pennsylvaniami narsaammut nakkarpoq kingullerlu USA-p illersornissamut ministereqarfianut Pentagonimut Washington D.C.-mi aportinneqarluni.
Toqutaasunit tuusintinit amerlanerusut suli kinaassusersineqarsimanngillat. Ajunaartut ilaat - 1641-mik normulerneqarsimasoq - siorna aggustimi ukiut qulikkuutaat qaangiutereersut aatsaat kinaassusersineqarpoq.
