41%-iinnaat Danmarkimi efterskolereerlutik ingerlaqqittartut
Ukioq manna atuarfiusup qaangiunnerani, Meeqqat Atuarfiini atuartut 281-it Danmarkimi efterskolernissamut akuerineqarsimapput. Taakkunannga amerlanerpaat 10. klassemi naammassisuullutik. Danmarkimi efterskolerniartut Namminersorlutik Oqartussanit tapiiffigineqarput.
Nunatsinni efterskolit, Qasigiannguani aamma Maniitsumi 2008-mi aallartereernerisa kinguneranik, Danmarkimut efterskolernissamut qinnuteqartartut ikileriarsimanngillat amerlisimanatillu.
Danmarkimi efteskolernerup kinguneranik tamanna atuartunut sunniutaasa iluaqutaassusianut aaqqissuussamik uuttuisoqarneq ajoraluarpoq. Taamaattoq Inerisaaviup Kalaallit Nunaanni Naatsorsueqqissaartarfik peqatigalugu kisitsisinik misissuitsiarsimapput. Taasani kisitsisit ersarilluinnartumik takutippaat, Danmarkimi efterskolereernerup kinguneranik toqqaannartumik ilinniarfinnut annernut ingerlaqqittartut 41 procentiusut. Maniitsumi efterskolereernerup kingorna ingerlaqqittartut 13 procentiullutik Qasigiannguanilu Villads Villadsenip Efterskolianit ingerlaaittartut 18 procentiullutik.
Nunatsinni efterskolet suli nutaajuneri pissutaatinneqartoq
Atuagassiami PI-mi allaaserineqarpoq, Nunatsinni efterskolinit toqqaannartumik ilinniarfinnut annernut ingerlaqqittartut taama ikitsiginerinut pissutaasoq tassaammat, Nunatsinni efterskolit aatsaat 2008-mi aallartimmata, tamanna tupinnartutut isigisariaqanngitsoq.
Efterkolertartut amerlanerit efterskolereernerup kingiorna ilinniarfinnut annernut toqqaannartumik ingerlaqqittalissappata, efterskolinit paasissutissiinerit pitsaanerusariaqartut, atuagassiaq PI allappoq aamma allallutik atuartut ataasiakkaat inuttut ineriartorneri pillugit taamatullu fagitigut siunnersorneqartarnissaat pitsanngortinneqartariaqartut allallutik.
Danmarkimi efterskolerniartunut Namminersorlutik Oqartussat ukiumut 10 millioner koruuninik tapiissuteqartarput.
