22-nik ukiulik Upernavimmi ujaarineqartoq

Avannaani Upernavimmi inummik maanna ujaasinersuaqarpoq.
Assi © : Nûno Isbosethsen/KNR
Allattoq Nauja Møller
septembarip 09-at 2015 18:33

Upernavimmiut piumasutsiminnik ujaaseqataasut peqatigalugit upernavimmi politiit arnaq inuusuttoq 22-nik ukiulik tallimanngormat ilaqutaanit tammaaneqartoq ujaaraat.

Tallimanngornermi ullaakkut arfineq marluk missaanni illoqarfiup eqqaaveqarfiata eqqaani 22-nik ukiulik kingullermik takuneqarpoq.

- Illoqarfimmiut piumassutsiminnik ujaaseqataasut 100-ut missaanniittut peqatigalugit arfininngormalli qeqertaq tamakkerlugu ujaasiffigineqarpoq, umiatsiallu qulit missaanniittut illoqarfiup avataanniittut qeqertat tamakkerlugit ujaasiffigaat. Taakkua saniatigut ungasinnerusunut qulimiguulik ujaasitinneqarpoq. Ajoraluartumilli 22-nillu ukiulimmit nassaassaasinnaasunik takusaqartoqanngilaq, Upernavimmi politeeq Michael Tange KNR-mut oqarpoq.

Arnap inuusuttup tammarnerata nalaani qanoq atugaqarnersoq politiit ilisimanngilaat.

Ujaasinerlu maanna ullut arlereermagit politiip ajornerpaamik kinguneqartoqarsimanissaa ilimagaa.

Arnamik inuusuttumik ujaasineq unnugu arfineq marlunut qiteqquppat nangeqqinneqassaaq, kingullermillu takuneqarfia tassa eqqaaveqarfiup eqqaa ujaasinermi aallaaviussasoq politiit nalunaarutigaat.