150 millionit koruunit innuttaasut akileraarpallaarutinik utertoorutisiassaraat
Akileraartartummi akileraarpallaarutinik utertoorutisisussat 21.500-nik sinneqarput, taakkulu Akileraartarnermut Aqutsisoqarfimmit pingasunngorpat 150 millionit koruunissaqartinneqassapput.
150 millioniniilli 44,2 millionit innuttaasut pisortanut akiitsuinut matussutissatut ilanngaatigineqassapput. Soorlu assersuutigalugu inissiaatileqatigiiffinnut INI-mut Iserimmullu akiligassatigut kinguaattoorutinut imaluunniit kommunimut namminersorlutillu oqartussanut allatigut akiitsunut.
Akileraarutinut inaarummik naatsorsuutit Sullissivik.gl aqqutigalugu aggustip 22-aniilli takuneqarsinnaalerput. Innuttaasullu 5000-it sinnerlugit ulluni siullerni pingasuni akileraarpallaarutinik utertoorutissaqarnerlutik akiligassaqarnerlutilluunniit alakkarsimavaat.
Akileraartartut 11.500-t katillugit 178 millionit koruuninik akileraarutinut tapissanut akiligassaqarput, taakkulu naafferaartumik pingasunut avillugit akiligassanngortinneqassasut, Akileraartarnermut Aqutsisoqarfiup ilisimatitsissutigaa.
