Sunngiffimmi aallaaniartartut puisip amiinik tunisisinnaanngortut
Great Greenlandip Namminersorlutik Oqartussanut sullissinissamik isumaqatigiissut avaqqullugu ataasinngorneq juunip 20-at aallarnerfigalugu allattuut amiinik sunngiffimmi aallaaniartartunut tunisisinnaaneq ammaaffigissavaa.
Taamatut immikkut ittumik iliuuseqarneq peqquteqarpoq allattuut amiinik amigaateqaleriataarneq, Great Greenlandip pisortaa Ditte Sorknæs tusagassiuutinut allalluni nalunaarpoq.
Aamma atuaruk Qasigissat amii piumaneqaraluartut Great Greenland ikiuussinnaanngilaq
Erseqqissarpaa ajornartorsiummik aaqqiigasuarallarnertut isigisariaqarmat. Ammeriviuttaaq erseqqissarpaa tamatumani taamaallaat ammit pitsaasut pineqarmata. Ammit pitsaassutsimut piumasaqaataasunik naammassinninngitsut itigartinneqarsinnaasut ilanngullugu nalunaarutigineqarpoq.
KNAPK taamatut aaqqiigallarnermut akerliunngilaq.
- Taamatut aaqqiigallarnermut KNAPK isumaqataavoq. Sullissinissamut isumaqatigiissummut attuinngimmat, taamaalillunilu piniartunik eqquinerlunnavianngimmat ajorinagu KNAPK'p siulittaasua Henrik Sandreen oqarpoq.