Sermit iigartartut nunarsuarmi nassaassaasut aatsaat taama aakkiartortigisut
Sermillu ilisimatuunit malinnaavigineqartut agguaqatigiissillugu ukiumut 50 aamma 150 centimeterit akornanni saannerulersimapput. Ilisimatuut nunanit tamalaaneersut taama oqarput.
- 1900-kkunnut naleqqiullugu tamanna marloriaammik pingasoriaammilluunniit annertuneruvoq, Michael Zemp, misissuinernik nutaanik ataqatigiissaarisoq oqarpoq. Misissuinermi inernerit atuagassiami Journal of Glaciologymi saqqummersinneqarnikuupput.
Sermit 2300-t missaat ilisimatuunit malinnaavigineqarnikut misissuinermi tunngavigineqarput.
- Sermit piffissap pineqartup ingerlanerani immaqa aatsaat taama aatsigisimapput, tassa sermit nalunaarsorneqartalerneranni aatsaat taama aatsigisimagunarlutik. Sermit Alpini nassaassaasut pingasoriaataat ukiumut annaasarpavut, Michael Zemp, USA-mi nittartakkat ilaannut Huffington Postimut taama oqarpoq.
Sermit Alpini nassaassaasut sukkanerpaamik aakkiartortut oqaatigineqarpoq, soorlu aamma sermit Alaskamiittut aakkiartupiloortut.
Silap pissusiata allanngoriartornerata kingunipilui pissutaasut ilisimatuut oqaatigaat.
