Sermersooq nunaqarfinni aningaasaliiniartoq
Nunaqarfiit qanoq iliornikkut innuttaasunut pitsaanerpaamik iluaqutaasumillu ineriartortinneqarsinnaanersut pillugu misissuisoqarnissaanut aningaasaliisoqarniarpoq, aningaasat tassunga atugassat 1 millionit koruuniullutik, ukiunilu tulliuttuni, tassa 2017-imi 2018-imilu ukiut tamaasa 5 millionit koruuninik atuisoqarniarluni.
Kommunimi nunaqarfimmi siulersuisut siulittaasui sisamaasut peqatigalugit missingersuutit siullermerneerneqarneranni isumasioqatigiittoqarpoq. Nunaqarfinni siulittaasut sanaartugassanut aningaasaliissutissanik arlalinnik kissaateqartut, Kommuneqarfik Sermersuup nittartagaani atuarneqarsinnaavoq.
AAMMA ATUARUK Sermersuup aningaasatigut missingersuutai aappaagumoortut iluatsipput
Kissaatigineqartut arlallit piviusunngortinneqarnissaat pillugu kommunalbestyrelsi aningaasanik nassaarpoq. Isertumi ilinniartitsisussaaleqisoqarnera assersuutissaavoq. Tassunga atatillugu aningaasaliisoqarpoq, ilinniartitsisup illuata iluarsartuunneqarnissaanut 500.000 koruuninik aningaasaliisoqarluni.
Kulusummi maannamut arsaattarfik ukiualunnguit matuma atorneqaqqusaajunnaarpoq, tassa imeqarfimmut qanippallaarnera pissutaalluni atorneqaqqusaajunaarluni. Illumik timersortarfiusinnaasumik tamatigoortumik sanasoqarnissaanut taamaammat 2 millionit koruuninik maanna aningaasaliisoqarnialerpoq.
