Issittoq Kinap aningaasarsiorneranut pingaaruteqartoq
Issittoq Kinamut ima pingaaruteqartigaaq, Kinap præsidentia Xi Jinping, USA-p præsidentianik Donald Trumpimik Floridami ataatsimeeqateqareernermi kingorna angerlariartornermini Anchoragemut Alaskamiittumut tikeraaqqaartariaqartutut misigisimalluni.
Alaskap sineriaa sinerlugu angalanermini sermit iigartartut takuniarpai, Alaskallu guvernøria Bill Walker ataatsimeeqatigalugu, niueqatigiinneq, takornariartitsineq siunissamilu suleqatigiinnissaq tassani eqqartorneqarlutik.
Kina tassaavoq Alaskap niueqateqarfiisa pingaarnersaat, aalisakkat, raajat qaleruallillu tunisassiarineqartarlutik, Kinalu aatsitassanik uuliamillu Alaskamit pisisarluni. Kina taamaasilluni Alaskamit 2016-imi 8,5 milliardit koruunit nalinginik pisivoq.
Umiarsuillu tikissinnaasassaat nutaat Kinap Alaskallu aamma soqutigisarivaat, aqqutissat nutaat silap kiatsikkiartornerata malitsigisaanik ammaassiffigineqariartortut ilutigalugit aqqutissat nutaat soqutigineqaleraluttuinnaramik. Alaskap Kinallu akornanni imaatigut angallannermi aningaartuutit ikiliartorlutik sukkaneruleriartorlutillu, niueqatigiinneq takornariartitsinerillu aamma ammaassiffigineqariartuinnarlutik.
Kinap præsidentiata Xi Jinpingip Alaskallu guvernøriata Bill Walkerip ataatsimiinnerat akunnernik sisamanik sivisussuseqarpoq, pissarsisaqarfiulluartutullu nalilerneqarluni.
