KNR ”Tallimanngorneq Unnuppaat Man” aallarteqqilerpoq

Tusarnaartartut isiginnaartartullu erinisussinnaanngorput tassami TV-kut aallakkaatittagaq nuannarineqarluartoq aallarteqqittussanngorpoq, aallakaatittagarlu tassaavoq ”Tallimanngorneq Unnuppaat Man”
februaarip 06-at 2015 14:30

 

Aallakaatittagaq inna unnummut arfineq pingasut qeqqanut takuneqarsinnaassaaq, tassani isiginnaartartut nammineq videoliaminnik saqqummiussaat sms-atorlugu taasissutineqarsinnaassapput. Nammineq videoliat pitsaanersaattut toqqarneqartoq angalassutissamik tunineqassaaq, taannalu tunissut koruuninik 20.000-nik naleqarpoq.

” Aallakaatittagaq eqqartorneqartoq aallartinneqaramili assut nuannarineqartarsimavoq. Tassani nammineq videoliat nuannersut takuneqarsinnaasarsimapput. Nuannarineqarnera aallaavigalugu 2015-ip affaanni siullermi nangeqqinniarlugu aalajangerpugut,” taama oqarpoq KNR TV-mi pisortaq Jan Berg.

”Tallimanngorneq Unnuppaat Man”-imik aaqqissuisartut isiginnaartartut tamaasa kajumissaarpaat nammineq videoliaminnik nuannersunik, inequnartunik aammalu aliikkutaasinnaasunik nassitseqqullugit. Nammineq videoliat saniatigut allatigut aamma arlalissuarsigut aliikkutassaqartitsisoqassaaq.

”Kingullerni aallakaatitsisarnitsinnut naleqqiullugu aallakaatitseriaaserput allanngortilaarsimavarput. Isiginnaartartut quiatsannissartik naatsorsuutigisinnaavaat. Allannguutit ilagissavaat inuit sianiginngisaannik videoliat,” taamatut oqaaseqarput piareersaasiortoq Simon Løvstrøm kiisalu aallakaatitsinermi aqutsisoq Aviaaja Rosing.

Immikkuullarissumik tupaallaatissatut sms-ersimasut akornanni aamma makitsisoqassaaq, tassanilu eqqugaassaavoq i Phone 6 nutaanerpaaq koruunit 1000-nik TUSASS-itut atugassanik imaqareersoq.

”Tallimanngorneq Unnuppaat Man” N.U.I.F.-ip illuutaaniit tallimanngornikkut unnukkut aallakaatinneqartassaaq. Isiginnaartunut ilaarusukkuit uunnga nalunaassaatit Simon Løvstrøm sml@knr.gl

Facebook.com/unnuppaatman aqqutigalugu videonik sumut nassitsinissaq takusinnaavat.

Aallakaatitsinermi oqaluttuussapput Maren-Louise Poulsen Kristensen aamma Ujarneq Fleischer.”Tallimanngorneq Unnuppaat Man” siullermik aallakaatinneqassaaq unnummut nalunaaqutaq 19,30-arfineq pingasunut qiteqquppat. Tamanna pissaaq KNR 1-imi.

 

Paasissutissanik annertunerusunik pissarsiniaruit attaveqarfigiuk KNR-imi aaqqissuisoq Simon Løvstrøm sml@knr.gl imaluunniit suliamik aqutsisoq Aviaja Rosing aro@knr.gl oqarasuaat 36 15 00.