Ivaaqqami pisoq inuit pisinnaatitaaffiinik unioqqutitsineruvoq

Innarluutillit najugaqarfianni Ivaaqqami najugallip meerartaariasaarneranut qisuariartut amerlaqaat.

Inuit pisinnaatitaaffii pillugit siunnersuisoqatigiit isornartorsiuingaatsiarput, inuit pisinnaatitaaffiinik annertuumik unioqqutitsinerunerarlugu, tusagassiuutinut nalunaarumminni allapput.

- Taama pisoqarsinnaanera assuarnarluinnarpoq ajorluinnarlunilu. Inuit pisinnaatitaaffiinik unioqqutitsineruvoq annertooq, Inuit pisinnaatitaaffii pillugit siunnersuisoqatigiit siulittaasuat, Qivioq Løvstrøm tusagassiuutinut nalunaatummi allappoq.

Suliaq arnamut 23-nik ukiulimmut, annertuumik innarluuteqartumut Qaqortumilu innarluutillit illuanni Ivaaqqami najugaqartumut tunngavoq.

AAMMA ATUARUK Laura Taunajik Uitsatikitseq nalornivoq: Paniga Ivaaqqamiitsiinnassanerpara?

Taassuma kinguaassiutitigut atornerlunneqarluni naartulersinneqarsimanissaa ilimanarpoq, tallimanngormallu ernertaarpoq. Taassumali ernisulinnginnerani naartunera kimilluunniit ilisimaneqarsimanngilaq.

- Pisumi matumani eqqugaasumi oqalussinnaanngitsumi pisussinnaanngitsumilu, inuttut isumannaassutsip kiffaanngissutsillu qulakkeerneqarnissaat pingaaruteqarluinnarpoq. Paaqqutarineqassallutik inissinneqartut toqqissisimassapput, Qivioq Løvstrøm oqarpoq.

- Taamatuttaaq ilaqutaasut paaqqinniffinni toqqissillutik qanigisaminnik tunniussisinnaassapput. Pisumi matumani inunnik innarluutilinnik illersuinermi tamatigut eqqortumik iliuuseqartoqartannginnera ersersinneqarpoq.

Pisariaqartitsineq aallaaviussaaq

Pisoq isumaginninnermut naalakkersuisumit, Mimi Karlsenimit (IA), ulloq unnuarlu paaqqinniffinni pissutsinik misissuinermik nuna tamakkerlugu aallartitsisoqarnissaanik nalunaaruteqarnera, Inuit pisinnaatitaaffii pillugit siunnersuisoqatigiit taperserpaa.

AAMMA ATUARUK Mimi Karlsen innarluutillip meerartaarnera pillugu: Eqqaaniissimasut tamarmik misissuiffigineqassapput

- Taama suliniuteqarniarneq taperserparput. Tamatuma saniatigut inuit innarluutillit pisariaqartitsinertik naapertorlugu Peqqinnissaqarfimmut saaffiginninnissaannut periarfissinneqarnissaat immikkut pingaaruteqarpoq. Inuup nammineq iliuuseqarsinnaanngitsup ataqqineqarnissaa erseqqissartariaqarpoq.

- Pisumi alianaqisumi matumani eqqugaasunut misiginneqataangaarnerput apuukkusupparput.

Innarluutillit illersuisuata puisoq aamma sakkortuumik qisuariarfigaa.