Nunatta septembarimi ammavinnissaa neriuutigigaat – amerlanerujussuilli akiuussuserneqarsimassapput
Nunatsinnut angalasunut killilersuiffiunani nunatta ammavinnissaa aggustip septembarilluunniit qaammataani piviusunngorsinnaavoq.
Tamanna Naalakkersuisut siulittaasortaavata, Múte B. Egedep neriuutigaa.
Kisianneqarporli: Qanoq amerlatigisut akiuussuserneqarumanersut nunatta ammavinnissaanut apeqqutaavoq.
- Aggustimi septembarimiluunniit ammaanerunissaq neriuutigaarput – kisianni qanoq amerlatigisut akiuussuserneqarsimanersut apeqqutaavoq, Múte B. Egede oqarpoq.
Nunatsinni: 12,5 procentit siullermeertumik kapitereerput.
7,5 procentit naammassillugu kapiteerput.
80 procentit siullermeertumik suli kapitinneqanngillat.
Danmark: 22,4 procentit siullermeertumik kapitereerput.
11 procentit naammassillugu kapitereerput.
78 procentit siullermeertumik suli kapitinneqanngillat.
Nunatsinnukartut sapaatip akunneranut 600-t corona pillugu allattoqarfimmit akuersissuteqarfigineqaqqaaratik ataasinngorpamit tikissinnaalernissaat Naalakkersuisut ullumi ammaappaat.
Nunatsinnukartulli Immersugassamik-Sumumik suli tunniussisassapput aamma nunatsinnut aallariartornissaminnut sivisunerpaamik akunnerit 72-t iluinni misissortissimassallutik nunatsinnullu tikinnerminnit ulluni tallimani angerlarsimaannartassallutik.
Nunatta ammaativinnissaaq aasap kingornanut utaqqisinneqartariaqarpoq. Tassungalu qanoq amerlatigisut akiuussuserneqarsimarusussanersut aamma apeqqutaassallutik.
Amerlavallaat illersuuteqanngitsut
Nunatsinni siullermeertumik kapitissimasut katillugit 8.867-iupput, naammassillugulu kapitissimasut 5.572-iullutik. Nakorsaanerullu, Henrik L. Hansenip oqarnera naapertolugu 50-ileereersimasut tamarmik kapitissimanissaat anguniagaavoq.
Danmarkimi aamma taava anguniagaqartoqarpoq – Naalagaaffeqatigiit kujasinnerusortaani 50-ileereersimasut tamarmik akiuussutissamik kapitissimalerpata ammaasoqarnissaa aamma pilersaarutaavoq.
- Maannakkutut isikkoqartillugu akiuussusersuineq aggustimi naammassissavarput. Akiuussutissamilli kapitinniartut nikerarput. Nunatta kujataaneeqqammerpugut tassanilu pingasuugaangata marluinnaat neqeroorummut akuersisarput. Taamaammat amerlavallaartut illersuuteqanngillat, tunillaassuuttoqalernissaanullu qulakkiissagutta tamanna naammanngilaq, nakorsaaneq oqarpoq.
AAMMA ATUARUK Nunatsinnukartussat qinnuteqaqqaartarunnaassasut: Nunarput ammaqqissaaq
- Piffinni allani akuersisoqarneruvoq. Ittoqqortoormiini akiuussutissamik neqeroorfigineqartut quliugaanta qulingiluat akuersisarput.
- Sapinngisamik amerlanerpaat akiuussuserneqarsimassapput. Tamanna inuiaqatigiinni ammaasoqarnissaanut alloriarnerit annertuut tulleraa.
Amerlanerpaalli akiuussuserneqarsimanissaat kiap akisussaaffigaa?
- Akiuussuserneqarnissaq ataasiakkaat akisussaaffigaat. Akiuussuserneqarusunnissarli inuiaqatigiinnut tamanut pingaaruteqarpoq. Naalakkersuisut assersuutigalugu nunatta avannaanut kitaanullu avataanit angalasoqarnissaa pillugu siunnersoraangatsigit tassani qanoq amerlatigisut akiuussuserneqarsimanerat apeqqutaasarpoq, Henrik L. Hansen oqarpoq.
Taamaammat akiuussusersuinerit maanna sukkatsinneqassapput.
- Maajimi aamma juunimi akiuussutissarpassuarnik naatsorsuuteqarpugut, nakorsaaneq oqarpoq.
Illoqarfinni annerni pingasuni 65-ileereersimasut akiuussuserneqarnissamik maanna neqeroorfigineqareerput. Illoqarfinni nunaqarfinnilu tikikkuminaatsuni 18-ileereersimasut aamma neqeroorfigineqareerput.
Tasiilami Ilulissaniillu avannarpasinnerusumi tulliani kapuisoqassaaq. Tamatuma kingorna taakkunani illoqarfiillu annerit sinnerini aappassaanik kapuisoqassaaq.
