Kirstine Davidsen Siumumit qinigassanngortittoq: Allakkat assillu avaanngunartut pivakka
- Iviangitit assileriarlugit uannut nassiutikkit, qinissavakkilli.
- Qaa, qaa angummi ataasiinnaavoq nuannisaarta nuannertigisoq, ingerlaannaq sletsissavakka. Qinersiseqassaatilli.
Kirstine Davidsen Siumut sinnerlugu Inatsisartunut qinigassanngortittoq Messengerikkut tamakkuninnga allagarsiaqarpoq.
Taassuma nassiussisut ilisarisimanngilai. Inunnillu aamma naleqqutinngitsunik assinik nassiussisoqarsimavoq.
- Inuit 20-t missaat uannut saaffiginnipput, aamma tiinganiartutut qanillattortutut pissusilersorlutik, qinigassanngortittoq KNR-imut oqarpoq.
Tamanna akuersaarneqarsinnaanngilluinnartoq taanna isumaqarpoq. Taassuma kinguaassiutitigut innimiilliornerup ullumikkormit ukkatarineqarnerulernissaa qineqqusaarutigaa.
- Allaffigineqarama misigisimavunga tujorminartumik, killissamik qaangiiffigineqarlunga. Inuk kinaluunniit innimigineqartariaqarpoq, innimigineqarnanga misigisimavunga.
- Qineqqusaanngikkaluarumaluunniit taanna misigissuseq avaanngunartoq pivara. Qamuunakkut kinguaassiutitigut atornerlugaaneq tassaaginnanngilaq timikkut attuuaneqarluni innarligaaneq, uanga misigisimavunga innarlerneqarlunga qamuuna tamakkuninnga oqaatsinik tuniorarneqarninni, Kirstine Davidsen KNR-imut oqarpoq.
Assinillu piumaffigineqarsinnaanini aamma uissuummissutigaa.
- Inoqatinut attaveqaatitigut qineqqusaarutima qisuariarfigineqarnerat tiingaffiginiarneqarneralu uissuummissutigaara. Tiingaffigitinniarluta qinersinissamut sassanngilagut. Inuiaqatigiinnut nunagisamullu kiffartuussinissamut nukissaqaraanni aamma tatiginaraanni imminullu tatigigaanni qineqqusaartoqartarpoq.
Taamaammat aamma nipangersimaannarusunngilaq.
- Pissutsit akueriinnarlugit sunngitsuusaaginnarsinnaanngilanga. Killissannik qaangiisoqarnera akuerisinnaanngilara aamma inummut kimulluunniit killissamik qaangiisoqarnissaa akuerisinnaanngilara, Kirstine Davidsen oqarpoq.
Taassuma suliaq politiinut unnerluutigissanerlugu maanna isumaliutigaa.
Tassumalu Nuummi Siumup immikkoortortaqarfiani siulittaasuata taperserpaa.
- Siumumi innimiilliortoqarnissaanut politikkiliornikuuvugut. Tassaniippullu piimmatiginninnerit kinguaassiutitigullu innimiilliornerit qanoq iliuuseqarfigissanerigut, akueriinnassanngilarpullu. Oqaluuserissavarput, Inga Dóra Guðmundsdóttir oqarpoq.
- Kirstine nammineq oqaloqatigaara aamma allakkat assillu takuakka. Tuparujussuarpunga. Suliap tusagassiuutitigut saqqummersinneqarnissaa isumaqatigiissutigaarput.
Inga Dóra Guðmundsdóttirip oqarnera naapertorlugu Kirstine Davidsenip suliaq politiinut tunniutissanerlugu nammineq aalajangigassaraa – tamanna Siumup akuliuffiginianngilaa.
- Kisianni tunniussissappat 110 procentimik tapersissavara, Inga Dóra Guðmundsdóttir oqarpoq.
KNR-ip allakkat takunikuuai.