Ilisimatooq Naalakkersuisuni isumaqatigiinnginneq pillugu: Ikinnerussuteqartoqalinngikkuni qinersisoqassaaq
Siumut nunatta kujataani Kuannersuarni aatsitassarsiornissamik suliniut ukiorpassuarni taperserpaat.
Greenland Minerals aatsitassarsiornissamut akuerineqassaguni uranimik aatsitassanillu qaqutigoortunik piaasoqassaaq.
Nunatta kujataani innuttaasunut ataatsimiititsinerit sapaatip-akunnerata tulliani aallartissapput - Siumulli tassanngaannartumik qularnerulerpoq. Tamanna partiip nutaamik novembarimi siulittaasortaarnerata siulittaasullu tullersortertaarnerata kingorna pivoq.
Naalakkersuisoqatigiit ajornartorsioqaat. Siumup siulersuisuunerisa Kuannersuarni suliniut pillugu kujataani innuttaasunik Naalakkersuisut ataatsimiititsinissaat kinguarteqquaat. Tamanna Naalakkersuisut siulittaasuata pakatsissutigeqaa.
- Unneqarillunga oqassagumaassut tupigigakku partiima politikkikkut sangujoorartumik ingerlalernera. Assersuutigiinnarlugu maanna Kuannersuarni suliniut pillugu, Kim Kielsen, aviisimut Sermitsiamut oqarpoq.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Paasissutissarsiffik: Pinngortitaleriffik aamma Nationalt Center for Miljø og Energi, IPN-iliaq
AAMMA ATUARUK Demokraatit: Naalakkersuisooqatigiinneq nalilersorneqartariaqarpoq
Taamak oqarneq soqutiginartuusoq Ilisimatusarfimmi inuiaqatigiilerinermik ilisimatooq naliliivoq.
- Siumup ingerlavimminik allannguerusulernera nunatta kujataani aallartippoq. Taqqavanimi Siumukkormiut ilaat partiimik anguniagaa assortorlugu oqalupput. Tamannalu Vivian Motzfeldtimut sunniuppoq, Siumullu iluani aatsitassarsiorsinnaaneq pillugu anguniagaq nalornisoqartorujussuanngorluni, Rasmus Leander Nielsen KNR-mut oqarpoq.
Siumup politikkertik allanngortissappassuk Demokraatit naalakkersuisoqataajunnaarnissaminnut piareersimapput.
- Anoraa maliinnarlugu politikki ingerlanneqalissappat, uanga allatut iliorsinnaajunnaassaanga taamatut ingerlatsisoqarnera Demokraatit peqataaffigissanngikkaat innersuussisariaqalissaanga, Jens Frederik Nielsen aviisimut oqarpoq.
AAMMA ATUARUK Immikkut ilisimasalik: Kuannersuit oqallisigineqarneranni Siumumi isumaqatigiinngingaatsiarnerit ersilerput
Ilisimatusarfimmi ilisimatooq naapertorlugu qinersisoqarsinnaanera ilimanarsinnaalluarpoq.
- Naalakkersuinikkut susoqassanersoq ullut 14-it iluanni aalajangiiffigineqartariaqarpoq, qinersisoqassanersoq naalakkersuisoqatigiilluunniit allanngussanersut. Illuatungiliuttut ilaasa pisut taamaatsillugit naalakkersuisoqatigiinnut ilaalerusunnerat nalornissutigaara. Ikinnerussuteqarluni naalakkersuisuutitaqartoqaqqilersinnaavoq qinersisoqarluniluunniit, Rasmus Leander Nielsen taama oqarpoq.
