DMI aqagu anorersuarnissaa pillugu: Sakkortoorujussuussaaq
Kitaata sineriaani aqagu silarlussaqaaq.
Paamiunit Sisimiut tikillugu anorersuassaaq, ulussaarsuartullu sakkortutigisumik anorersuarujussuarluni siallingaatsiassaaq.
- Anorlertorujorujussuussaaq, Hans Wenner DMI-p Kangerlussuarmi silasiortua oqarpoq.
Naqitsiniisaffik ulussaarsuartitsisussaq Canadami Paggivittamiit nunatta kujataata Qeqertaaluullu akornanni imartaamut nuukkiartorpoq. Tamannalu silarlungaatsiartitsissalluni.
- Paamiunit Sisimiunut Kujasik-kangisimmik aamma kujasimmik ullup ingerlanerani anorlerneruleriartussaaq. Nuummi ualip ingerlanerani anorersuartut sakkortutigileriartortumik anorlissaaq.
- Anoraasuaq sekundimut 35-init 40-t tikillugit tassa ulussaarsuartut sakkortussuseqalersinnaasassaaq, Hans Wenner oqarpoq.
Anori kujataaneertussaammat qerilerfimmiit 5 gradit missaannik kiassuseqalissaaq. Taamaalillunilu siallilissaaq.
- Sineriammi silarlussaqaaq. Aserorterinertaqarsinnaanissaa annilaangassutigaara - minnerunngitsumik Nuummi, silasiortoq oqarpoq.
Nuummi ualineriaani unnukkulluunnit anorersualissaaq. Tamatumalu kingorna silarlunnera Sisimiunut Maniitsumullu anngutissalluni.
- Aqqusinertigut angallannerit pisariaqanngitsut nangaasaarutigineqarnerannik kinguneqarsinnaavoq, Hans Wenner oqarpoq.
- Pigisat tingissinnaasut eqqussorneqanngikkunik qilersorneqassapput. Nuummi naatsiivimmi pequtit kitaanut teqqaateqqunagit eqqussorneqassapput.
Ullup ataatsip missaani silarlussaaq.