Nukissiorfiit: Utoqqarmiut Kangerluarsunnguanni nukissiorfik allilerneqanngippat innaallagiaq akitsussaaq

Nuummi inuit inissiallu amerliartormata innaallagiap nunatsinni tamarmi akitsornerannik isumaqarsinnaavoq. Nunatsinnimi nukimmik pissarsiviit pingaarnersaata ernga paqqeriartorlunilu innaallagiamik pilersuisinnaajunnaariartortoq, Nukissiorfiit ilisimatitsipput.
- Utoqqarmiut Kangerluarsunnguanni innaallagissiorfimmik alliliilersaarneq siunertaqarluartoq isumaqarpugut. Nuummuinnaanngitsoq nunarpulli tamaat eqqarsaatigalugu, Kaspar Mondrup oqarpoq. Assi © : Nukissiorfiit
Allattoq Malik Brøns
oktobarip 21-at 2020 11:13

Inuppassuit Nuummut noorarput, Utoqqarmiut Kangerluarsunnguannilu erngup nukinganit nukissiorfik inuppassuarnut innaallagialersuiniapiloorpoq.

Taamaammat Utoqqarmiut Kangerluarsunnguanni erngup nukinganit nukissiorfik allilerneqanngippat innaallagiaq ikinnerpaanik 900 koruuninik ukiut sisamat qaangiuppata akitsorsinnaasoq, Nukissiorfiit tusagassiutinut ilimasaaripput.

- Innaallagiap maannakkumiit akitsornissaa nunatsinnilu inoqutigiit tamarluinnarmik ukiumut 928 koruuninik 2024-miit akiliinerusalernissartik naatsorsuutigissagaat piviusuuvoq, Nukissiorfiit nukissiuuteqarnermut pisortaat Kaspar Mondrup oqarpoq.

AAMMA ATUARUK Naalakkersuisut Qasigiannguani Aasiaannilu erngup nukinganik nukissiorfimmik pilersitserusuttut

Illoqutigiit ataatsit agguaqatigiisillugu atuinerminnut ukiumut 4.950 koruuneertarput.

Assi © : Nukissiorfiit

Assi: Kaspar Mondrup / Nukissiorfiit

Nukissiorfiit innaallagiamik Nuummi pilersuinerulernerminni orsussamik dieselimik atuinerusariaqarlernissaat innaallagissap akitsortussanngorpasinnerannut patsisaavoq. Utoqqarmiut Kangerluarsunnguannili erngup nukinganit nukissiorfik allilerneqarpat innaallagiaq akitsornavianngitsoq, Nukissiorfiit ilisimatitsipput.

Taamaammat nukissiuuteqarnermut pisortap Utoqqarmiut Kangerluarsunnguanni nukissiorfiup allilerneqarnissaa Naalakkersuisunut Inatsisartunullu kaammattuutigaa.

Naalakkersuisut, namminneq siunnersuutigisimasartik, Inatsisartut 2019-imi ukiaanerani ataatsimiinnerminni akuerisimasaat, tunngavigalugu, Nuummi erngup nukinganit nukissiorfiup allilerneqarnissaanik siunnersuutertik Inatsisartut ukioq manna ukiaanerani ataatsimiinneranni kingullermik saqqummiuppaat. Siunnersuutaalli taanna ukiaanerani ataatsimiinnermi nassaassaanani.

Alliliineq nukissiorfiliornerlu 3 milliardit koruuneqassasoq

Utoqqarmiut Kangerluarsunnguanni tatsit erngup nukinganit nukissiorfianut imilersuisut paqqeriar-tornerat taamaalillunilu innaallagissiorsinnaajun-naariartorneq Nukissiorfinnut unammilligassaavoq.

Utoqqarmiut Kangerluarsunnguanni erngup nukinganit nukissiorfiup, tatsip allap tassa Isortuarsuup Tasiata imilersuutaareersup Kangerluarsunnguup Tasianiit kujammut 16 kilometerisut ungasitsigisumiittup atulerneratigut, allilersaarneranut pilersaarutaavoq. 

Erngup nukinga innaallagianngortinneqarsinnnaavoq. Nukissiorfiit orsussaq dieseli atoraangamikku pujuliortitsisarput. 

Utoqqarmiut Kangerluarsunnguanni erngup nukinganit nukissiorfiup allilerneqarnissaanik siunnersuut, Qasiagiannguani Aasiannilu erngup nukinganit nukissiorfiliornissanik aamma ilaqarpoq. Tamanna katillutik 3 milliardit koruunit missaannik akeqassangatinneqarpoq.

AAMMA ATUARUK Nukissiorfiit qaammatini arfineq pingasuni direktøreqarsimanani nutaamik pisortartaassaaq

Naalakkersuisut piginneqatigiiffimmik 3 milliardit koruuninik pissarsiortussamik pilersitsinissaat, inatsisissatut siunnersuummi siunnersuutaavoq. Aningaasat taakkua aningaasanik attartorneqassapput.

Nunatsinni illoqarfiit pingaarnersaat inuttusiartortoq

 

Nuummi inuit 1.400-nik ukiuni tallimani kingullerni amerlisimasut, Naatsorsueqqissaartarfiup kisitsisaataani erserpoq.

Nuummi inuit 2015-imi 17.036-upput, 2020-mi 18.472-iullutik.

 

Nuuk 30.000-nik 2030-mi inoqalersimanissaa, Kommuneqarfik Sermersuup takorloorpaa. Taamaammat Nuup ilaani Siorarsiorfimmik ateqartussami sanaartortoqassaaq. Taanna Qinngorput Kangerluarsunnguullu akornanniippoq. Inuit 5.000-t missaat kommunip oqarnera naapertorlugu tassani najugaqassangatinneqarput.

Tamannali pissarsiviulluarumaartoq, nukissiuuteqarnermut pisortaq isumaqarpoq:

- Alliliineq soorunami akeqarpoq, akilli siunissami appasitsissavai. Ilaqutariit ataasiakkaat inuussutissarsiortullu innaallagissamut maanna aningaasartuutigisartagaat taama qaffatsiginnginnissaannik aamma qulakkeerutaassaaq.

- Utoqqarmiut Kangerluarsunnguanni innaallagissiorfimmik alliliilersaarneq siunertaqarluartoq isumaqarpugut. Nuummuinnaanngitsoq nunarpulli tamaat eqqarsaatigalugu, Kaspar Mondrup oqarpoq.

2021-mi upernaami ataatsimiinnissamut kinguartinneqartoq

Utoqqarmiut Kangerluarsunnguanni erngup nukinganit nukissiorfiup allilerneqarnissaanut aamma Qasigiannguani Aasiannilu nukissiorfiliornissamut siunnersuut Inatsisartut 2021-mi upernaami ataatsimiinnissaannut oqallisigineqartussatut kinguartinneqartoq, Nunanut Allanut Nukissiuuteqarnermullu Naalakkersuisoqarfik ilisimatitsivoq.

Taamaaliorneq ilaatigut coronap ajornartoortitsineranik peqquteqarpoq.

Erseqqissaaneq: Naalakkersuisut innaallagissap, erngup kiaallu akianik aalajangiisarput.