Aki-Matilda Høegh-Dam: Saqqummeratta nukittunerulerpugut
Aki-Matilda Høegh-Damip kinguaassiuutitigut innimiilliorfigineqarnikuunini avammut ammasumik oqaluttuarinikuuaa. Taassuma saqqummernissamut nalornisut saqqummernissaannik maanna kajumissaarpai.
Ima iliorpugut:
KNR nittartakkakkut apersuinermi immersugassaq atorlugu misissuivoq.
Kommuninut tamanut, Namminersorlutik Oqartussanut Inatsisartoqarfimmullu apeqqutit nassiunneqarput.
Apersuinermi immersugassaq inunnit 5500-it missaanniittunit tiguneqarpoq.
Taakkunannga akissutit 607-it KNR-p pissarsiarai.
Misissuineq tamakkiisumik misissuinerunngilaq pineqartorli ajornartorsiutaasoq erserpoq.
- Tunuarsimaaraluarussiluunniit sapinngilasi, inuiaqatigiinni nukittunerulernissaq allanngueqataanissarlu anguniarlugu, imminut kinguaatsinnullu, Aki-Matilda Høegh-Dam KNR-imut oqarpoq.
AAMMA ATUARUK Misissuineq: 71 procentit kinguaassiuutitigut innimiilliortarneq ajornartorsiutaaneraraat
Taanna arnat Siumumut attuumassutillit qulingiluat peqatigalugit Siumumi allattaanerusimasumit Partii Naleqqami maanna allattaasumit Mikael Petersenimit kinguaassiuutitigut innimiilliorfigineqarsimalluni februaarip qaammataani oqarpoq.
AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga
Suliffimmi kinguaassiutitigut innimiilliorneq suua?
Taassaavoq inuk ataaseq arlallilluunniit ingasattumik arlaleriartumilluunniit inuit allat pissusilersorfigippatigit, pissusilersorfigineqartunit nakkarsaataasutut misigisaannik. Kinguaassiutit tungaatigut narrutsannartuliornerit tassaapput kinguaassiutit tungasunik malugititsinerit suulluunniit kissaataanngitsut tamarmik.
Tusarfik: Den Store Danske.
- Nukittunerulerpugut. Iliuuserisarput eqqortuusoq nalunnginnatsigu, pissutsillu siunissami pitsanngortariaqarsorigatsigit. Suliffeqarfimmi naligiimmik toqqissisimalluta tamatta sulisinnaanissarput pingaartikkatsigu, Aki-Matilda Høegh-Dam oqarpoq.
Høegh-Dam: Eqqartuisa
Taassuma avammut saqqummerneq imaannaanngitsorujussuusoq oqaatigaa. Sammisarlu oqallisigisariaqalernerarlugu.
- Avammut saqqummerneq imaannaanngitsorujussuusimavoq. Kisianni ammanerusumik inuiaqatigiinni tamakkua eqqartortariaqalerneri pingaaruteqarpoq. Aamma suna tamaat eqqartuussivikkooqqaartariaqanngimmat, Aki-Matilda Høegh-Dam oqarpoq.
AAMMA ATUARUK Siulittaasoq: Kinguaassiuutitigut innimiilliorfigineqarneq paquminarunnaartariaqarpoq
KNR-ip misissuinerani peqataasut 71 procentiisa kinguaassiuutitigut innimiilliortarneq ajornartorsiuterujussuartut nalilerpaat, 27 procentiisa sulinerminni misiginikuullugu akipput, 43 procentiisalu sulinnginnerminni misiginikuullugu akillutik.
Politikerip inuusuttup misigisaqapilussimasut imminut pisuutinnginnissaannik kaammattorpai.
- Imminut ataqqillutit imminullu pisuutinnak. Aamma ingerlaannaq naaggaarsimanngikkuit imminut ajoriniaqinak, taamaaliornikkut ingerlariaqqinnissaq ammaffiginerulersinnaavat, Aki-Matilda Høegh-Dam oqarpoq.
Politikeriusimasup misiginikuugaa
Naaja Nathanielsen politikeriunermini kinguaassiuutitigut innimiilliorfigineqartarsimalluni marsip qaammataani aamma oqaluttuaraa.
Taamaaliortartullu angutaanerusartut utoqqasaanerusut taanna oqarpoq.
- Uanga ukioqatima nukarlerillu ataatsimut isigalugu ajunngitsumik qaninniarnerit naliginnaasut, pissusilersuutillu killissamik qaangiisut assigiinngissusaat takusinnaalluarpaat, Naaja Nathanielsen oqarpoq.
AAMMA ATUARUK Arnani politikkimik suliaqartunut oqaaserineqartartut: Nulupajui!
Taassuma kinguaassiuutitigut innimiilliortarneq inuiaqatigiinni ajornartorsiutaasoq taamani oqaatigaa.
- Partiiniinnaq ajornartorsiutaanngilaq. Tamannami politikikkut sulinermiinnaq pisanngilaq.
- Inuiaqatigiinni arnarpassuit naliginnaasumik kissaatiginngisaminnik oqarfigineqartarlutillu attuuaneqartarnerat ajornartorsiutaavoq. Tamanna uatsinnut nuanninngitsumik inissiisarpoq, Naaja Nathanielsen oqarpoq.
