Hans Enoksen: 2009-mi inuiattut ullorsiorutta namminersorneq nunatsinni atuutilissaaq
Naalakkersuisut siulittaasuata Hans Enoksenip inatsisartut ataatsimiinnerata ammarnerani oqalugiaammini ulluni naliginnarni inuunitsinni aporfiusartut siunissarlu anginerusumik sammivai.
Inuiaqatigiinnili ajornartorsiutinut aaqqiissutissanik tikkuussinngilaq.
- Ukioq 2009-mi juunip ulluisa 21-ani inuiattut ullorsiorutta nunatta namminersulernera nalliussissavarput, taama oqarpoq Hans Enoksen inatsisartut ataatsimiinnerata ammarnersiornerani oqalugiartilluni.
Piffissami aggersumi assigiinngitsutigut kommunit namminersornerullutillu oqartussat ingerlataanni angisuumik pisariillisaaneqassasoq, naalakkersuisut siulittaasuata oqalugiaammini pingaartillugu aamma oqaatigaa.
Tassunga atatillugu Hans Enoksenip marloqiusamik ingerlatsinerup atorunnaarsittariaqartoq oqaatigaa.
Allaffissornerup millisarneqarnissaanik oqarnerminut tapullugu Hans Enoksen oqarpoq pisortat suliffeqarfiutaasa 14-iusut ikilisarnissaat aamma angusariaqartoq kiisalu inatsisartuni ilaasortat 31-usut 25-iinnanngortinnissaat aamma eqqarsaatigisariaqartoq, pisariillisaanissani kommunit kisiisa peqqunagit aamma Namminersornerullutik Oqartussat angisuumik nammaqataasariaqarmata.
Ataatsimut isigalugu naalakkersuisut siulittaasuata siunissaq isumalluarfigaa, taallugu inuutissarsiutinik nutaanik pilersitsiortornissaq.
Tamatumani aatsitassarsiorfiit nutaat 1500-nik suliffigineqartussat aluminiuliorfissarlu 600-nik suliffigineqartussaq taavai. Ilanngullugu oqaatigaa pilersitsiortuinissamut atatillugu ilinniartitaaneq ilinniarusussuseqarnerlu qaffassaqqinneqartuartariaqartut.
Nunap inoqqaavisa pisinnaatitaaffiisa illersorneqarnissaat pillugu Naalagaaffiit Peqatigiit isumaqatigiissuteqarnerat tamatta nuannaarutigisariaqaripput, Hans Enoksen oqarpoq. Akinik assigiikkunnaarsitsisimanerup kinguneqarnerlunnera nassuerutigalugu Hans Enoksen aamma oqarpoq nunaqarfinni illoqarfinnilu atukkat sukumiisumik nalilersoqqinneqartariaqartut.
Nunatsinni imigassamik atuipiluttoqarnera Naalakkersuisut siulittaasuata mininngilaa.
– Meerannguit atugarliortitaanerat ullut tamaasa tusartuagarput akueriinnarsinnaajunnaarparput, Hans Enoksen oqarpoq. Hans Enoksenip tamatumunnga atatillugu inatsisartuni partiit tamaasa qinnuigai aaqqiissutissanik ujartueqataaqqullugit.
Avatitsinniit soqutigineqaleraluttuinnarnerput tikeraarneqartalernerpullu eqqarsaatigalugu immitsinnut qiviarnissarput pingaaruteqartoq Hans Enoksenip aamma oqaatigaa, ajornartorsiutivullu nammineerluta aaqqinniartariaqarivut aamma oqaatigalugu.
