Norgep avannaani GPS-it russiussangatinneqartunit akornusersorneqarnerusalertut

Rusland Ukrainemik saassussilermalli, Norgep avannaani sumiissusersiutit GPS-it akornusersorneqarnerusalernerat Norgemi timmisartortartut nalunaarutigisalerpaat.

Norgemi attaveqaqatigiinnnermut suleqatigiit, Nkom, taama ilisimatitsisoq, aviisi Dagens Næringsliv allappoq.

Sumiissusersiutit GPS-it 2019-imi katillutik ulluni arfinilinni tamakkiisumik atorneqarsinnaajunnaartut, 2021-mi ullut 18-it tamakkiisumik atorneqarsinnaasimanngillat.

GPS-illu Norgep avannaata ilaani 2022-mi ullut 122-t 2023-milu ulluni 294-ini tamakkiisumik atorneqarsinnaasimanngillat.

GPS-it jammerneqartarnerannik taaguuteqarpoq, radiokkut attaveqarniarneq ajornarsisarluni:

- GPS-it Norgep avannaani Finnmarkimi ukioq manna februaarip 22-ata tungaanut ulluni 44-ni akornusersorneqarsimapput, Nkomimi ingeniøri Nicolai Gerrard oqarpoq.

Norgep avannaani nunap immikkoortua, Finnmark, Finlandimut Ruslandimullu killeqarfeqarpoq.

Nkom GPS-it tamaani aamma akornusersorneqarnerat erseqqissaatigalugu Litauenimi suleqatiminut allagaqarpoq.

Ruslandimi oqartussat sumiissusersiutit GPS-it akornusersorneqartarnerat pillugu oqaloqatigineqareersut, Nkom ilisimatitsivoq:

- Norgemi ministeriunerup Ruslandip præsidentia tamanna pillugu oqaloqatigaa, pitsanngoriaateqarneranilli tamanna kinguneqarsimanani, Nkom allappoq.

Norgep ilaani Finnmarkimi sakkutooqarfiit russit tamaaniittussanngitsut sakkutooqarfinnillu assiliisut maluginiarneqarnissaat Finnmarkimi politiit innuttaasunut kajumissaarutigisimagaat, Norgemi tv-qarfiup NRK-p qaammatip massuma ingerlanerani oqaluttuaraa.

Sakkutuut Nordic Responsemik taallugu marsip aallartisimalaarnerani sungiusarnissaat sioqqullugu politiit taama kajumissaaruteqarput.

Sakkutuut 20.000-nit ikinnerunngitsut sungiusaqataassapput, timmisartut malersuutit, qamutit sorsuutit, aqqartartut umiarsuillu timmisartut aallartarfii atorneqassallutik. Norgemi illersornissaqarfik taama ilisimatitsivoq.