 |
 |
< Nutaarsiassat tamaasa (knr.gl/nutaarsiassat)
|
Suliffissaqanngitsut 2009-mi amerleriarput Ataasinngorneq februaarip 08-at 2010 nal. 18:00 Nunatsinni illoqarfinni suliffissaaleqisut siorna amerleriaateqalaarput. suliffissaaleqisut amerlassusaasa ukiup naanerani agguaqatigiissinnerini, 2008-mut sanilliullugit qaamammut 0,6 procentpointimik amerleriarput.  Naatsorsueqqissaartarfiup kisitsisaatai nutaat taama takussutissiipput. Illoqarfinni suliffissaaleqisut qaammammi ataatsimi agguaqatigiissillugit 1313-iupput. Taanna procentinngorlugu 4,6 procentiuvoq. Naatsorsueqqissaartarfiup kisitsisaataanni illoqarfinnut 17-inut tunngasuni, illoqarfinni assigiinngitsuni suliffissaaleqisut amerlassusaat assigiinngissuteqarput. Taamaalilluni illoqarfiit aqqaneq-marluk suliffissaarusimasut agguaqatigiissinnerinit amerlanerusunik suliffissaaleqiffiupput. Kangaatsiami suliffissaaleqisut amerlanerpaapput, tassa suliffissaaleqisut qaammammut agguaqatigiissillugu 8 procentimiit 17 procentimut amerleriaramik, taannalu nuna tamakkerlugu agguaqatigiissitsinermit sisamariaammik qaffasinneruvoq. Naak amerlanertigut angutit suliffissaarusimanerusaraluartut, Kangaatsiami arnat, suliffissaaleqisut procentiata qaffariarnerannut pisooqataapput. Tasiilami suliffissaaleqisut ikileriarnerpaapput. Tappavani suliffissaaleqisut 2008-mi agguaqatigiissillugu qaammammut 102-nik amerlassuseqarput, taakkuli 2009-mi 56-iinnanngorsimallutik. Naatsorsueqqissaartarfiup kisitsisaataanni ilinniagaqarnerup imminut akilersinnaanera takuneqarsinnaavoq. Suliffissaaleqisut qaammammut agguaqatigiissinnerini, ilinniagaqarsimanngitsut 82 procentiupput. |
Nutaarsiassaqartitsivik allaffigiuk
Immersugassaq una atorlugu KNR-imi Nutaarsiassaqartitsivik allaffigineqarsinnaavoq.
(Imaluunniit e-mail atorlugu: news @ knr.gl )
