 |
 |
< Nutaarsiassat tamaasa (knr.gl/nutaarsiassat)
|
Nunatta Ammerivia Københavnimi saqqummersitseqataalerpoq Ataasinngorneq februaarip 08-at 2010 nal. 17:30 Atisanik nutaanerpaanik takutitsisaqattaarnerit Københavnimi pingasunngorpat aallartissapput, periarfissatsialallu tamanna Nunatta Ammeriviata atorluarniarsaraa. Nunatta Ammeriviata pisortaanera Henrik Estrup taama oqarpoq.  Great Greenland puisip amiinik tunisassiaminik Københavnimi aamma takutitsissaaq. - Suliatsinnik saqqummersitsisarnissarput pingaartipparput. Danmarkimit Nunatsinniillu pisisartutoqqatsinnik naapitsinissarput neriuutigaarput, pisisartullu nutaat aamma naapinnissaat neriuutigalutigu. Suliattami takutinnissaat pingaartipparput, Nunatta Ammeriviata pisortaanera Henrik Estrup oqarpoq. Atisanik nutaanerpaanik Københavnimi takutitsisaqattaarnerit, Copenhagen Fashion Fair, Øksnehallenimi pisussaapput, pingasunngorpallu februaarip aqqarnanni aallartissallutik. Nunatta Ammerivia suliaminik saqqummersitsiveqassaaq, meeqqanut annoraat qaatiguullu ilaatigut saqqummersinneqassallutik. Arfininngorpat immikkut ittumik pisoqassaaq. Tassami Nunatta Ammeriviata atisanik ilusilersuisartut Isaksen Design peqatigalugit saqqummersitsissaaq, nipilersortoqassallunilu. Immikkut ittumik aaqqissuussaq Arctic Elementsimik taaguuteqartinneqassaaq. Tassani Søs Fenger, Nukâka Coster-Waldau aamma Juno tusarnaartitsisussaapput: - Pisisartutta takkunnissaat ilisimareerparput, aamma Kalaallit Nunaanneersut. Taakkumi aamma nalunngilaat Copenhagen Fashion Fairimi peqataasugut, taamaammat oqaloqatiginissaat ilimagaarput, suliatsinnillu saqqummersitsivigissallugit. Nunatta Ammeriviata suliaannut tunngatillugu qanoq kissaateqarnersut annertunerusumik aamma paasisaqarfiginerulissagipput qularinngilara, Nunatta Ammeriviata pisortaanera Henrik Estrup oqarpoq. Immikkut ittumik aaqqissuussami kalaallit nerisassiaat aamma sassaalliutigineqassapput. |
Nutaarsiassaqartitsivik allaffigiuk
Immersugassaq una atorlugu KNR-imi Nutaarsiassaqartitsivik allaffigineqarsinnaavoq.
(Imaluunniit e-mail atorlugu: news @ knr.gl )
