 |
 |
< Nutaarsiassat tamaasa (knr.gl/nutaarsiassat)
|
Føroya Banki: SparBankip immikkoortuinik pisineq isumatusaarneruvoq Ataasinngorneq februaarip 08-at 2010 nal. 17:05 Føroya Bankip Nunat atlantikumut atasut Danmarkilu niuffaffissamisut pissusissamisoortutut isigai. Aamma Savalimmiut kalaallillu inuussutissarsiortui qanittumik attaveqarfigeqatigiittuaannarnikuupput. SparBankip nunatsinni imikkoortortaanik pingasunik pisinertik, Føroya Bankip pisortaanerata, Janus Petersen, taama tunngavilersorpaa.  Føroya Bankip Sparbankip nunatsinni immikkoortortai pingasut aamma pisiarai. SparBankip Fynimi Jyllandimilu immikkoortortai qulingiluat Savalimmiut bankiata aamma pisiarai. - Kalaallit Nunaanni sulinissatsinnut pissangaqaagut. Aamma upperaarput, Kalaallit Nunaanni inuuniarnermi atukkanik, inuussutissarsiornermik allanillu paasisimasaqarluartuulluta, ilaatigut pissutigalugu, atukkat ilaat Savalimmiuni atukkanut assingummata, Janus Petersen, Savalimmiormiut bankiutaanni pisortaanerusoq oqarpoq. Føroya Banki bankinik sillimmasiisarnermillu ingerlatsereerpoq, Islandimilu sillimasiisarfimmitksiorna pisilluni. Pisortaaneq immikkuualuttunik oqaluttuarusunngilaq, taamaallaalli oqaatigalugu SparBankip Nunatsinni Danmarkimilu immikkoortuinut aqqaneq marlunnut pisinerminni 300 millioni koruuninik akiliisimallutik. Kisianni immikkortut taakkua aqqaneq marluk pisiarinerisigut Føroya Banki 50 procentimik allivoq. - Naammagisimaarinneqaagut. Ukiorpassuarni pitsaasumik ineriartorsimavugut, isertitarissaarluta, kisiannili niuerfinnik nutaanik iserfissaaleqisimalluta. Tassalu Danmarkimut Kalaallit Nunaannullu isernitsigut niuerfinnut nutaanut pivugut, siger Janus Petersen. Naak SparBankip maanna tunisaani ingerlatseriaaseq paasiniaqqaartussaagaluarlugu, pisortap ilimaginngikkallarpaa, suliffeqarfimmik ingerlatseriaaseq allanngortissallugu imaluunniit sulisunik allannguissalluni. - Aallartitsigatta sunik tamanik allanngortitserissanngilagut. Misissueqqaassaagut. Kisianni tungaviusumik isigagaanni, immikkoortoqarfiit isumatuumik ingerlataapput, atukkiussat isumannaatsuullutik sulisullu pikkorisuullutik. Pisinerput iluarisimaarnaqaaq, Janus Petersen oqarpoq. Immikkoortoqarfiit aqqaneq marluk, Føroya Bankip SparBankimit pisiai, 30.000-it missaannik sullitaqarput 136-nillu sulisoqarlutik. SparBankip Nuummi, Sisimiuni Ilulissanilu immikkoortortaasa pisiarinerisigut, SparBankip Nunatsinni immikkoortoqarfia tamaat Føroya Bankip pisiaraa. Pisortaanerup Janus Petersenip neriorsuutigaa, SparBankip Nunatsinni sullitai tamarmik ulluni qaninnerni pisinermik ilisimatinneqassasut. |
Nutaarsiassaqartitsivik allaffigiuk
Immersugassaq una atorlugu KNR-imi Nutaarsiassaqartitsivik allaffigineqarsinnaavoq.
(Imaluunniit e-mail atorlugu: news @ knr.gl )
