Tukuma Arctikap pituutai kittorartut
Royal Arctic Linep umiarsuaataa Tukuma Arctica 179 meterisut takissusilik, Savalimmiuni illoqarfiit pingaarnersaanni Torshavnimi, sakkortuumik anorersuarnerata kingunerisaanik talittarfimmi ippassaq unnukkut talinnganerani pituutarsui kittorarput.
Umiarsuarlu umiarsualivimmi sannikarluni inissisimasoq, umiarsuaatileqatigiiffik tusagassiuutinut nalunaarpoq.
Umiarsuaq Aarhusimut arfininngornermi ullaakkut ingerlaqqittussaagaluarpoq, pisorli pissutigalugu kinguaattoortussanngortoq, Royal Arctic Line nalunaarpoq.
Ullumikkut misissorneqassanngitsoq
Aarhusimi nassiussanik tigusisussat pisumit eqqorneqartut nassiussat qaqugu tigussaneraat ataasinngorpat ilisimatinneqassapput.
Sila atoruminarseriarpat umiarsuaq aqqartartumit misissorneqassaaq, ajoqusersimanersorlu nalilersuiffigineqassalluni.
Misissuinerli ullumikkut pisinnaanngitsutut naatsorsuutaavoq.
- Misissuinerup sapaatip ingerlanerani pisinnaanissaa naatsorsuutigaarput, umiarsuaatileqatigiiffik taama paasissutissiivoq.
Pisumi inunnik ajoqusertoqanngilaq uuliamillu aniasoqarsimaneranut maannakkorpiaq takussutissaqarani.