Siulittaasoq katersuiniarneq pillugu: Tupannermik uippallingajappunga

3.923.213 millionit koruunit.

Nappaassuarmik kræftimik eqqugaasut ikiorniarlugit Neriuffiit Kattuffiat ippassaq katersuiniartitsimmat aningaasat aatsaat taama amerlatigisut katersorneqarput.

AAMMA ATUARUK Neriuffiup siulittaasua katersiniarnerup aallakaatinneqannginnerani: Tapiissutit tamarmik isumaqarput

Katersuiniarneq isiginnaarutikkut toqqaannartumik Nuummi kulturikkut illorsuarmit Katuamit ingerlanneqarpoq.

Coronavirusi aningaasaqarnermut sunniinerlunnikuummat aningaasat taama amerlatigisut katersorneqarnissaat Neriuffiit Kattuffiani siulittaasut ilimagisimanngikkaluarpaa.

Siorna aningasat 3.252.133 millionit koruunit katersorneqarput, ukioq manna 3,923.213 millionit koruunit katersorneqarlutik.

Kattuffiup siulittaasuata paasigamiuk katersorneqartut siornarnit amerlanerusut tupaallassimaqaaq.

- Katersuiniarnermi akunnermi siullermi siorna katersukkat angusinnaassagivut paasinarsivoq. Uippallingajappungaluunniit eqqarsarlunga qanormi iliussaagut? Misigissuseq nuanningaarmat naluaraluunniit qanoq nassuiassanerlugu, Mette Sofie Jørgensen oqarpoq.

Metaldetektori kaasarfimmiuullu

Katersuiniarnermi kajumissutsimik suleqataasut sianerlutik tapiiniartunik oqaloqateqartarput. Nunatsinni sumiiffinnit arlalinnit katersuiniarsimasunik oqaluttuassarsisarlutik.

- Axel Hansen Tasiilameersoq oqaloqatigaara. Taassuma metaldetektorini atorlugu nunami aningaasanik nassaarisimasaminik katillugit 270 koruuninik tunniussaqarpoq. Aningaasat nassaavisa ilagaat kalaallit aningaasaat 1926-imeersoq - nuannerluinnarpoq. Axel tunniussaanut qutsavigerujussuarparput, Pele Broberg oqaloqatigisimasani pillugu oqaluttuarnera Tele-Postip facebookimini allaaseraa.

Siarnguttunik oqaloqateqartoq alla Sofia Rossen ima oqaluttuarpoq:

- Maniitsumi nukappiaratsiarsuaq 12-inik ukiulik Peter Davidsen kaasarfimmiunnguani sipporlugit 200 kr.-imik tunniussaqartoq – Qutsavigerujussuarparput!, Tele-Post facebookimini allappoq.

Aningaasanik tapersiiginnartoqartanngitsoq

Aningaasat katersorneqartut kræftimik eqqugaasunut taakkualu ilaqutaannut tapiissutigineqassapput. Taavalu napparsimasunut oqaloqatiginnittartunut pikkorissaanikkut immikkoortortaqarfiillu amerlisarnissaat anguniarneqassalluni.

- Oorinik tuniinnaraluarutsigit iluaqutissanillu allanik tuniorarnagit siunertaannginnami. Napparsimasuugaanni ilaqutaagaanniluunniit pisaqariaqarami oqaloqateqartarnissaq avitseqateqarluni paasineqarluni misiginissaq. Taamaattumik oqaloqateqartartut amerlanerpaat piginissaat kattuffimminngaanniit pingaartitarivarput, Mette Sofie Jørgensen oqarpoq.