Nunatta killilersugaanngitsumik niueqatiginnissinnaaneq misissorpaa
Qinersinissamik suaaruteqarneq sioqqutitsiarlugu Naalakkersuisuusimasut ilassutitut aningaasaliisoqarnissaannik qinnuteqaataat Inatsisartuni akuerineqarput.
Killilersugaanngitsumik niueqatigiinnissaq Nunanut allanut naalakkersuisoqarfimmit maannangaaq misissorneqarpoq.
Naalakkersuisut 2014-imi ilassutitut aningaasaliissutinik qinnuteqarput. Aningaasat taakku Nunatta pingaarnertut nioqqutissiaanut akitsuusersuisarnerup qulaajarneqarnissaanut atorneqassasut Inatsisartunit akuersissutigineqarput.
- Suliassaq siulleq tassaavoq nunani sorlerni akitsuusersueriaatsillu suunerinik paasiniaanissaq. Tamannalu pereerpat aatsaat oqarsinnaalissaagut nunat sorliit nakkutiginerussanerlutigit. Killilersugaanngitsumik niueqatigiinnissamik isumaqatigiinniarnerit suliassarujussuupput imaannaanngitsut, taamaattorli sulissutiginissaa qilanaaraarput, Kaj Holst Andersen nunat allanut naalakkersuisoqarfimmi pisortaq oqarpoq.
AAMMA ATUARUK Savalimmiut Tyrkialu killilersugaanngitsumik niueqatigiinnissamik isumaqatigiissuteqartut
Killilersugaanngitsumik niueqatigiinnissamut isumaqatigiinniarnerit sivisusinnaapput. Taamaammat Kaj Holst Pedersenip piffissami qanittumi isumaqatigiissusiorsinnaanissaq ilimaginngilaa.
Taamaattorli Kalaallit Nunaata Savalimmiunut sanilliullugu inissisimanera pitsaaneruvoq. Tassami Nunarput imarsuup akianiittutut isigineqarlunilu akuerisaavoq.
Taamaammallu Kai Holst neriulluarpoq.
- Savalimmiunut sanilliulluta Europamiunit niueqateqarnissamut periarfissavut pitsaanerupput. Taamaakkaluartorli niueqatigiinnissamut aporfiusinnaasut suuneri ilisimalernissai pingaaruteqarluinnarpoq, Kai Holst Andersen oqarpoq.
Suliarineqarnerali qanoq sivisutigissanersoq oqaatigisinnaanngilaa
Nunat sorliit maluginiarneqassanersut apeqqutaalluinnarpoq. Nunat isumaqatiginiarumasat aamma isumaqatigiinnissamut soqutiginnittariaqarput. Taamaammat qaqugu isumaqatigiissuteqartoqarsinnaaneranik siulittuinissaq siusippallaarpoq. Tassami nunarput piumasaqaateqartussaavoq, nunalli allat aamma kissaateqartussaapput. Nunat tamarmik inooqataaffigisinnaasaannik isumaqatigiissusiornissaq pingaaruteqarpoq, Kai Holst Andersen oqarpoq nangillunilu;
- Soorunami pitsaaquteqarlutillu ajoquteqarsinnaapput. Imaakkajuttarpormi nunat allat isumaqatiginiakkat suliffeqarfinnik aallartitsisinnaanissaannik ammaanneqartarput. Tamannalu Nunatta iluani allatigut akeqarsinnaavoq. Taamaammat tamanna tassaassaaq Naalakkersuisut peqqissaarullugu isummerfigisariaqagaat, Kai Holst Andersen oqarpoq.
