Kleist: Islandimi ministeriunerup tutsuinartumik attaveqarsinnaanini pisariaqartittorujussuussavaa
Islandimi inatsisartut qaammammi ataatsimi isumaqatigiinniareerlutik Den Grønne Venstrebevægelsemit, Katrin Jakobsdottir nunaminni ministeriussatut amerlanerussuteqarfigalugu aalajangerpaat.
Katrin Jakobsdottir naalakkersuisooqatigiit partii ukuusut Den Grønne Bevægelse, Selvstændighedspartiet Fremskridtpartiillu siuttuuffigissavai.
Kuupik Kleist naalakkersuisunut siulittaasuugallarmat, Katrin Jakobsdottir Islandimi naalakkersuisuusimasuni ministeriusimavoq. Kuupik Kleistip 41-nik ukiulik politikereq nersualaaruteqarfigaa.
- Uanga ilisarisimanninnera naapertorlugu arnaavoq inuusuttoq pikkorissoq, sulinikkut eqeersimaarluartoq, aammalu inuppalaartuusoq oqaloqatikkuminarluni.
AAMMA ATUARUK Island nutaamik ministeriunertaartoq
Piginnaasallu taakku piffissami aggersumi pisariaqartissavai.
- Tassa nassuiaasinnaassuseqarnini aammalu inunnut attaveqarsinnaassuseqarnini pingaarnerpaatut pisariaqartittussaavai. Aammalu innuttaasut polikerillu akornanni tatigineqatigiinnerup pilersinneqaqqinnissaa suliassaatut pingaarnerpaatut isigivara, Kleist oqarpoq.
Naalakkersuisunut siulittaasuusimasup naalakkersuisut ukiut qulit ingerlaneranni assigiinngitsut quliusimasut innersuussutigaa.
- Inuiannut islandermiunut tutsuinartumik attaveqarsinnaanini pisariaqartittorujussuussavai, tassami Islandimi ukiuni arlalissuarni naalakkersuinikkut eqqisiviilliortoqarpoq, assigiinngitsut pissusissamisuunngitsut pisartut eqqarsaatigalugit aamma aningaasaqarnikkut ingerlatsineq tutsuiginanngitsutut ingerlasarsimammat, Kuupik Kleist naggasiivoq.
AAMMA ATUARUK Islandimi naalakkersuisut isumaqatigiinninniarnerat ajalusoortoq