Inatsisartut ukiakkut ataatsimiinnerat sivitsorneqarpoq
Inatsisartut ukiakkut ataatsimiinnerat, aappaagumut aningaasanut inatsisissatut siunnersuutip akuersissutigineqartussaanera pissutigalugu sivitsorneqarpoq. Sermitsiaq.AG taama allaaserisaqarpoq.
Allattoq Jonas Fievé
novembarip 10-at 2017 20:14
Inatsisartunut ilaasortat Juullimut sulinngiffeqalernissartik kinguartittariaqassavaat, ukiakkummi ataatsimiinnerat ullunik sisamanik sivitsorneqarpoq, novembarip ulluisa 20-anni aatsaat naammassineqartussatut maanna pilersaarutigineqalerami. Sermitsiaq.AG taama allaaserisaqarpoq.
Inatsisartut ukiakkut ataatsimiinnerat sisamanngorpat novembarip ulluisa 16-ianni naammassineqartussatut pilersaarutaagaluarpoq, ataatsimiinneralli tassa sivitsorneqartussanngorluni.
Aappaagumut aningaasanut inatsisissatut siunnersuutip pingajussaaneerneqarnissaa matumani pissutaavoq, siunnersuummi aatsaat akuersissutigineqareerpat Inatsisartut Juullimut sulinngiffeqalersinnaassapput. Sermitsiaq.AG taama allaaserisaqarpoq.
