Tulukkat meeqqanit silatunerusut

Tulukkaat pisinnaasaat paasiniarlugu ilisimatuussutsikkut misissuinerit assigiinngitsut ingerlanneqarsimapput. Tassuuna paasisimavaat tulukkat meeqqanit sisamanik ukiulinnit arlalitsigut piginnaasaqarnerusut, The Independent allappoq.

Ilisimaneqareersimavoq tulukkat nerisassanik peqqumaasersortartut.  Inuit, aapakaat uumasullu arlaqanngitsut allat kisimik nerisassaminnik peqqumaasersortaraluarput. Tulukkalli aamma toqqorterisarput.

Isumaqartoqarsimavoq ilimagisamik malinninnerusoq. Taamaattoqanngilarli, svenskit ilisimatusartut paasisimavaat tulukkat pilersaarusiortartut.

Misiligaanerni assigiinngitsuni tulukkat paasipallattarpaat pissarsiassat annersaat sumiinnersoq, taamaattumillu pissarsiassat minnerit avaqqutaartarlugit. Tulukkat aapakaatulli pilersaarusiullaqqitsigisut ilisimatusartut oqarput.

Tulugarlu misiliummik nalorsinneqaqqaaraangami meeqqamit sisamanik ukiulimmit silatusaarnerusartoq oqaatigineqarpoq.