Nuugaatsiarmiut 39-t qimagutitinneqartut

Nuugaatsiarmiut 39-t maannamuugallartoq nunaqarfimminnit qimagutitinneqarsimasut politiit ilisimatitsissutigaat.
Assi © : Zeeb Nukannguaq
juunip 18-at 2017 07:42

Nuugaatsiaq tassaarsuaqarneranit eqqugaanerpaasutut isikkoqarpoq, nunaqarfimmiullu tamarluinnaasa qimagutitinneqarnissaat oqartussanit sulissutigineqarpoq.
 
Nuugaatsiarmiunillu 100-t missaanniittunit 39-t maannamuugallartoq Uummannakaanneqarsimapput.
 
Nunap sajussimanera oqartussanit aamma nalunaarutigineqarpoq. Nunap sajunnera richterskalamik uuttorlugu 4,1-iuvoq, tamannalu unnuaq tassaarsuaqarneranut qarsutsisoqarneranullu pissutaavoq.

AAMMA ATUARUK Det ved vi

Nunallu sajoqqissinnaammat Uummannaq eqqaaniittut kajumissaarneqarput sissameeqqunagit.

Namminersorlutik Oqartussat ilisimatitsissutigaat inuit ujaasinermut peqataarusuttut Uummannami nunaqarfiinilu tankeqarfinnut akeqanngitsumik orseriartorsinnaasut.

Illorsuit aamma eqqugaapput

Illorsuit aamma malerujussuarnit eqqugaapput. Oqartussalli naliliinerat naapertorlugu Illorsuarmiut illuminnut utertissinnaapput, nilliasaatinilli kalerrisaarisoqarnerani qutsinnerusumukartoqarnissaa oqartussat erseqqissaatigaat.

Politiit peqqinnissaqarfik sinnerlugu Uummannami nunaqarfiinilu kiisalu Upernavimmi nunaqarfiinilu innuttaasut mobiilikkut attaveqaatinik sapinngisamik atuinnginnissaat kajumissaarutigaat, oqarasuaatikkut attaveqarniarneq peqqinnissaqarfimmit ajornartorsiutigineqarmat - tamannalu mobiilinik atuinerup attaveqaatinik artorsartitsineranik pissuteqarsinnaammat.

Upalungaarsimaniarnermut oqartussat oqarasuaammik ilaqutaasut sianerfigisinnaasaannik aamma pilersitsisimapput. Ilaqutaasut qanigisaasullu ernumassuteqartut apeqqutissaqartullu tassunga sianersinnaapput. Aamma ajorani tasunga nalunaarttoqarsinnaavoq. Oqarasuaatip normoraa 365249.

AAMMA ATUARUK Upernavik og bygder uden for yderligere fare

Tusarfiit tutsuiginartut arlallit naapertorlugit ajunaartoqarlunilu ajoqusertoqarsimavoq, upalungaarsimaniarnermullu oqartussat qassit ajunaarsimanersut ajoqusersimanersullu maannamuugallartoq oqaatigiumanngikkallarpaat.

Nunaqarfinni eqqugaasuni pisut sakkortuut assilineqarnerat inuit attaveqaqatigiittarfiini takuneqarsinnaapput.