Siumup gruppia ilisimatinneqarsimanngitsoq

Enok Sandgreenip Qaasuitsup kujasissortaani borgmesterinngornini tallimanngormat nalunaarutigitinnagu, Siumup gruppiata sinneranut isumasiueqqaanngilaq.
apriilip 10-at 2017 12:48

Siumup Atassutillu isumaqatigiissimanerat nalunaarutigineqarmat gruppip sinnera tupaallassimasut, Otto Jeremiassen oqaluttuarpoq.

- Taanna isumaqatigiissut takulaarusullugu sms-eqattaarluta piumasarigaluarparput. Atsiorneqartinnagumi gruppi tamarmi isumaqataaffigalugu akuersissuteqarfigisussaasariaqaraluarmagu, Otto Jeremiassen KNR-imut oqarpoq.

AAMMA ATUARUK Enok Sandgreen borgmesterinngussaaq

Enok Sandgreenimut attaveqarniarsarisut

Gruppilu Atassummut isumaqatigiissusiorsimasunut Enok Sandgreenimut Nikolaj Jeremiassenimullu tassa attaveqarniarsarisimavoq.

- Ingerlaannartumik qisuariarluta Siumumit qinikkat tallimaalluta SMS-eqattaarpugut sianeqattaarlutalu. Kisianni attavigineqarneq ajorpugut iliuuserisaraluagullu tiguneqaratik, Otto Jeremiassen oqarpoq.

AAMMA ATUARUK Ane Hansen borgmesterinngortussanngortoq

Tamannalu pissutigalugu Siumut sinnerlugu Qaasuitsup kujasissortaani kommunalbestyrelsissami ilaasortassat tallimat, tassalu Otto Jeremiassen, Kristian Broberg, Kristian Jeremiassen, Timooq Mølgaard Jess Svanelu Inuit Ataqatigiinnut isumaqatigiinniaqqissallutik aalajangerput.

- Taava tassani isumaqatigiippugut, ingerlariaqqittariaqaratta, ataasiinnarmik ikannerussuteqarluni pineq, iluamik ingerlasinnaasutut aammalu ataqatigiittutut ingerlasinnaasutut isiginnginnatsigu, taava isumaqatigiippugut Inuit Ataqatigiinnut saaffiginninniarluta. Tassani amerlanerussuteqarluarsinnaaneq, suliassamullu taama oqimaatsigisumut sulinissaq pitsaanerussasoq isumaqarfigigatsigu, Otto Jeremiassen oqarpoq.

KNR-ip Enok Sandgreen oqaaseqartinniarlugu attaveqarfiginiaraluarpaa iluatsinnaguli. Siumumit qinikkani isumaqatigiinniaqqaartup aappaa, Nikolaj Jeremiassen, apersorneqarnissaminut piffissaqannginnerarpoq.

AAMMA ATUARUK Ilaasortaaffissat Qaasuitsoq Kujallermi agguataarneqartut