RAL: Sikuki aallaavittut umiarsualivinngussaaq

Aalborgip umiarsualiviata Royal Arctic Line Aalborgimi umiarsualivik atuinnaqqullugu maanna tatiniarsarinerulerpaa. Aalborgilli umiarsualivia Royal Arctic Linemi siunissaminnut ilaanngitsoq pisortaanerup, Verner Hammekenip, naqissuserpaa.

Allattoq Bibi Nathansen, Thomas Munk Veirum

oktobarip 07-at 2016 17:11

- Royal Arctic Linep isumaqatigiissummik eqquutitsinnginnera oqaasissaalatsiffigilaarparput, Aalborgip umiarsualiviata siulersuisuisa siulittaasuat Aalborgillu borgmesteria Thomas Kastrup Larsen KNR-imut oqarpoq.

Royal Arctic Linep Aalborgip umiarsualivianik aallaavittut umiarsualiveqarnissamik isumaqatigiissut 2022-p tungaanut atuuttussatut atsiugaq taamatinniarunnaanngippassuk, umiarsuaatileqatigiiffik 200 millionit koruuninik taarssissuteqaqquneqarsinnaanera siunnersortimik kisissimagaat, Thomas Kastrup Larsen oqarpoq.

Aamma atuaruk RAL-ip Aalborgimiikkunnaanera inuussutissarsiornermik eqquisinnaavoq

Royal Arctic Linelli pisortaanera naapertorlugu umiarsuaatileqatigiiffiup Aalborgip umiarsualivianik atuiunnaarnissamik kissaataa Aalborgimi nutaarsiassaasussaanngikkaluarpoq.

- Pilersaarutigut Kalaallit Nunaannut iluaqutaasuusussaasut isigisagut Aalborgip umiarsualivianut qangali nalunaarutigaagut. Aalborgillu umiarsualivianik siusinnerusukkut atuiunnaarnissrput, tamatuma kingunerissavaa,

Royal Arctic Linep pisortaanera Verner Hammeken oqarpoq.

Aamma atuaruk Aalborgip umiarsualiviata Royal Arctic Line tatiniarsarigaa

Pisortaaneq naapertorlugu umiarsuaatileqatigiiffiup Aalborgimi umiarsualivik isumaqatigiissut pillugu siornali decembarip qaammataani oqaloqatiginiarsimagaluarpaa.

Aalborgilli umiarsualiviata taarsiissuteqaqqu-sinialer-saarnera pillugu Verner Hammekenip erseqqissarpa, isumaqatiguussut atorunnaarsissimangikkitsik, oqarluni, assartuusseriaaseq nutarsarniarlugu pilersaarutitik malikkusullugit Aalborgimi umiarsualivik ilisimatissimagitsik.

Nuummi nutaamik talittarfiliortoqarnera ilaatigut pissutigalugu, RAL isumaqatigiissumit aniniarpoq.

- Oqartoqarsinnaavoq Nuummi Sikuki aqqutigalugu Nunatsinni umiarsualiveqalissasoq aallaaviusumik. Taamaalillutalu umiarsualiviit amerlanerit, Aalborgimiillu nunarsuatsinnut attaveqarluarnerusunut, tikissinnaalissallugit, Verner Hammeken oqarpoq.
Taanna naapertorlugu Royal Arcitic Linep Islandimiut pigisaannik Eimskipimi suleqateqarluni assartuussinermini Danmarkimi Aahusimi umiarsualivik atortassavaat.

Aamma atuaruk RAL: Nalunngilarput Aalborgip umiarsualivianut tusarluarnerunngitsoq