Qulaarpaa Inuit ataasiakkaat sunniuteqarsinnaanerat kommunerujussuit nukittorsarpaat
Inuit ataasiakkaat sunniuteqarsinnaanerat sanngiillivoq nukittorsarneqarlunilu. Aammali kommunit kattussuunneqarneranni Namminersorlutik Oqartussat kommunillu suliassatik sumiginnarsimavaat.
Qaasuitsup kommuniani innuttaasut isornartorsiutaat ersaripput. Peqataatinneqartutut misigisimanngillat. Taamaattumik politikerit suliniutitik aaqqissutissaqartinnagit taamaatiinnarpaat.
Aamma atuaruk Avinnerup iluaqutaanissaa qularnartoq
Kommunilli aaqqissuuteqqinnissaannut ilusilersueqataasimasoq isumaqarpoq aaqqiinissamut suli periarfissaqartoq.
- Kommunimi innuttaasut peqataatinneqarnerunissaat anguniarlugu periarfissat atorneqarsimanngillat, Kommunit aaqqissuuteqqinnissaannut ataatsimiititaliami siulittaasuusimasoq Martha Labansen taama oqarpoq, uparuarlugulu siunnersuutaasimagaluartoq kommuniusimasuni isumalioqatigiisitanik pilersitsisoqarnissaa.
Kommunit pillugit ilisimatusartoq Roger Buch aamma isumaqarpoq ataasiakkaat sunniuteqarsinnaanerat pitsanngorsarniarlugu periarfissaqarluartoq, erseqqissarluguli 2009-mi kommunimi politikerit 70-iniit 21-nanngortinneqarnerat ataasiakkaat sunniuteqarsinnaanerannut kinguneqapilummat.
- Akissutaasinnaasoq sakkortooq tassasinnaavoq qanoq iliortoqarsinnaanngilaq. Kommunerujussuanngortitsinermi tassa ingerlaqqittoqareerpoq. Innuttaasut taava misigilerpaat qinikkatik ungasissorujussuarmiittut ilisarisimanngikkitillu. Innuttaasut qanoq pisoqarnera pillugu ilisimasaqartutut misigisimanngillat, Roger Buch
oqarpoq.
Nunami tamarmi nalunaajaammik suliaqartoq Klaus Georg Hansen isumaqarpoq innuttaasut politikerinut attaveqarnertik kipineqarmat ataasiakkaat sunniuteqarsinnaanerannik annaasaqarnertut isigigaat. Taamaakkaluartoq taanna isumaqarpoq aaqqissuusseqqinnermi inuit ataasiakkaat sunniuteqarsinnaanerat ilaatigut pitsanngorsaavigineqartoq, inatsisitigummi atukkat innuttaasunut assigiinnerulersimapput.
- Siusinnerusumut naleqqiullugu innuttaasut assigiinerusumik pineqalersimapput. Imaappoq ullutsinni imminut iluaqutissanik isumaqatigiinniartoqarsinnaanngilaq. Siornatigut imminnut iluaqutissiuuttartunut killiffik ajorsisimavoq.
- Tamanna eqqarsaatigalugu kommunit 2009-p kingorna nukittoriarsimasut oqarsinnaavugut.
Aamma atuaruk Qulaarpaa Politikerit nuanninngitsunik aalajangiinissartik pikkoriffigineruleraat
Kommunit kattussuunneranni siunertaavoq innuttaasut pillugit suliassat kommuninut apuunneqarnissaat taamaalillunilu inuit ataasiakkaat sunniuteqarsinnaanerat sakkortusarlugu.
Martha Labansenili nassuiaavoq taamaallaat alloriarneq siulleq tiguneqarsimasoq, tassalu kommunit kattussuullugit.
- taavali kommunit kattussuunnerannut siunertaasoq puigorpaat, Martha Labansen oqarpoq erseqqissarlugulu Qasuitsup kommunia avissagaanni suliassat kommuninut anngussuunnissaat suli ajornarnerulissasoq.
