Qulaarpaa Tunumi takornariaqarneq suliffissanik pingaartunik pilersitsisinnaasoq
- Suliassarpassuaqarpoq siornamullu sanilliutissagaanni ukioq manna aatsaat taama aningaasanik kaaviiaartitaqartigivugut.
Suliffeqarfimmik Arctic Dreamimik piginnittoq, Lars Anker Møller oqaluttuarpoq.
- Taamaallunga Tasiilami qimussereerlunga angut Schweizimiu naapippara, taanna angallatsitsivimmik piginnittuuvoq. Ullullu ilaanni sianerfigivaanga aperalunilu Kuummiuni qimussertitsisartoqarnersugut, tusarsimagamiummi qimussertitsisartoqanngitsoq. Taava oqarfigaara pisariaqartissinnaasatit tamaasa pigaagut.
Oqaloqatigiinneq aallarniisoq pillugu Lars Anker Møller taama oqarpoq. Suliassarpassuaqarporlu, Lars Anker Møller maanna 20-nik sulisoqarpoq - amerlanerpaartaallu najugaqavissuupput.
Suliffissat pisariaqartinneqartut
Suliffissallu pisariaqartinneqarput, kommunalbestyrelsemmi 2015-imi naatsorsuinera malillugu, Tunumi sulisinnaasuni agguaqatigiisillugu 18 procentii suliffissaaleqisuupput - taakku Tasiilami nunaqarfiinilu aammalu Ittoqqortoormiiniipput.
Visit Greenlandimilu pisortaq, Tunumilu ukiuni 16-ini najugaqarsimasoq, Anders Stenbakken malillugu, Tunumi takornariaqarnerup inerisarnissaa qitiulluinnarpoq.
- Tunumi takornariaqarneq ingerlalluarpoq, unittoortinnaveersaartariaqarparpullu, aningaasarsiutaalluarsinnaavormi.
Anders Stenbakken malissagaanni, takornariaqarnermi periarfissat pingaaruteqarput, Tasiilamilu mittarfiliornissaq pillugu ersarissumik paasititsisoqartariaqarluni.
Ilinniarnissamut periarfissat pitsaanerusut
Mittarfittaarnissarlu Lars Anker Møllerimut aamma pingaaruteqarpoq. Ukiulli arlallit suli utaqqissaaq.
Siunissarlu qaninneq eqqarsaatigalugu takornarianik umitsianik angallassisinnaasunik ilinniartitsisinnaanerup periarfissaanissaa akikinnerusinnaanissaalu ujartorneqartariaqarpoq, taamaalillutik piniartut saniatigooralugu takornarianik sullissisalernissaat anguneqarsinnaammat.
- Piniartut umiatsiaararsorluartarput, taamaammat ilinniartittariaqarpagut. Qanittuanili tamanna pisariaqarpoq, toqqissisimanissaat ilaquttaminnullu qaninnissaat pinerullugu, Lars Anker Møller oqarpoq.
Tunumi takornariaqarnerup ineriartortinnissaa pillugu tusagaqarnerusinnaavutit sisamanngorpat Qulaarpaami kalaallisut arfineq-pingasut qeqqanut qallunaatullu nalunaaqutaq qulingiluanut tanneq arfineq-marlunut toqqaannartumik oqallitsitsisoqalerpat.
