PITUFFIK Pituffimmi kiffartuussinissamik isumaqatigiissut danskit suliffeqarfiutaasa annaavaat

Amerikami eqqartuussiviup Pituffimmi sakkutooqarfimmi kiffartuussinissamik isumaqatigiissut pillugu eqqartuussut atortussaajunnaartippaa, isumaqatigiissullu milliardinik naleqartoq amerikamiut ingerlatseqatigiiffiannut tunniunneqarluni, Finans taama allaaserisaqarpoq.
Allattoq Ritzau
juunip 24-at 2016 06:57
Nutserisoq Simon Uldum -

Pituffimmi sakkutooqarfimmi kiffartuussinissamik isumaqatigiissutip milliardinik naleqartup amerikamiut ingerlatseqatigiiffiannut Exelis Servicesimut tunniunneqassasoq Amerikami eqqartuussivimmi eqqartuussisut pingasut aalajangerpaat. Finans taama allaaserisaqarpoq.

Finans naapertorlugu eqqartuussut tamanut suli nalunaarutigineqanngilaq, tusarfiilli arlallit tusagassiuummut uppernarsarpaat eqqartuussisut isumaqatigiillutik kiffartuussinissamik isumaqatigiissut Exelis Servicesimut tunniunneqartussanngortikkaat.

Aamma atuaruk Amerikamiut Pituffik pillugu suliami kukkunertik nassuerutigigaat

Isumaqatigiissutip milliardinik naleqartup inatsisitigut assortuussutaanerani danskit suliffeqarfissui pingasut Per Aarsleff, Copenhagen Arctic kiisalu Greenland Contractors, Namminersorlutik Oqartussat piginneqataaffigisaa, ajorsarput, Finans taama allappoq.

USA-p illersornissaqarfiata Pituffimmi sakkutooqarfimmi kiffartuussinissamik isumaqatigiissutip 2,4 milliardit koruuninik naleqartup ukiuni arfineq-marlunni atuuttussap amerikamiut suliffeqarfiutaannut aningaasaqanngitsumut 2014-imi tunniussinerata kingorna suliffeqarfiit taakku pingasut USA-mi eqqartuussivimmut suliassanngortitsipput. USA-p, Nunatta Danmarkillu akornanni isumaqatigiissut pisoqaq unioqqutinneqarluni tamanna pivoq.

Isumaqatigiissulli Amerikami eqqartuussivimmit 2015-imi juulip qaammataani atortussaajunnaartinneqarpoq Exelis amerikamiut ingerlatseqatigiiffiata Vetrusip ataani ingerlatseqatigiiffittut aningaasaqanngitsutut nalilerneqarmat. Eqqartuussulli suliassanngorteqqinneqarpoq maannalu atortussaajunnaarsinneqarluni.

Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera

Finans naapertorlugu, amerikamiut eqqartuussisuisa nunat tamalaat akornanni isumaqatigiissutit pinnagit suliariumannittussarsiuussinermi oqaasertaliussat isiginiarsimavaat, naak danskit nunanut allanut tunngasunut ministereqarfiata isumaqatigiissutit taakku isiginiarneqartussatut isumaqarfigigaluarai.

- Naalagaaffiit taakku marluk (Danmark aamma USA, aaqq.) isumaqatigiissutip nunat allat piginneqatigiiffiinut allanit aqunneqartunut tunniunneqannginnissaa siunertarisimasinnaavaat. Nunat naalakkersuisuisa tamanna suliassaraat. Isumaqatigiissutit atorunnaarsissinnaavaat suliariumannittussarsiuuteqqillugillu. Matumani pineqartoq tassaavoq suliariumannittussarsiuussineq, Finans taama allappoq.

Isumaqatigiissummit isertitat 10 procentii akileraarutitigut akitsuutitigullu Nunatta pissarisaqaatigisarai siornatigut oqaatigineqarpoq.

/ritzau/