Nunatta karsia 1 milliard koruuninik amigartooruteqarfiussaaq
Oqaatigineqartareerpoq.
Aningaasat utoqqartatta pilersornissaannut atugassat, soorlu assersuutigalugu utoqqalinersiassaannut, inissiassaannut peqqinnissaannullu atorfissaqartinneqartut.
Aamma ilinniakkaminnik naammassinnittartut ikippallaarput. Inersimasut ajornartorsiut taanna aaqqiivigisassaat, taakkuli aamma ikiliartuinnarput.
Unammillernartut taakku Naalakkersuisut upanniarpaat, tamatumunngalu atugassatut aningaasaqarnermut naalakkersuisup Randi Vestergaard Evaldsenip napatitsinermut siuariartortitsinissamullu pilersaarut ippassaq saqqummiuppaa.
Inuusuttut ikiliartornerisa saniatigut ilinniakkamik naammassinnittut aamma ikittuararsuupput. Taamaammat inuusuttut 2015-imi meeqqat atuarfianni naammassinnittut 70 procentiisa ukiut 20-t qaangiuppata suliffeqarfiit atorsinnaasaannik ilinniagaqalersimanissaat anguniagaavoq.
- Nassuerutigisariaqarparpullu sunniutit kissaatigineqartut takkutissappata inuiaqatigiit aaqqissugaaneranni assigiinngitsorpassuartigut iluarsiisinnaagatta, siunissami kinguaariit pigissarnissaat atugarissaarnissaallu qulakkeerniarlugit taamaalillutik tamatsinnut toqqammaviulerlutik, Randi Vestergaard Evaldsen pilersaarutimini allappoq.
Naalakkersuisut Napatitsinermut siuariartortitsinissamullu pilersaarutaat ataatsimut isigigaanni iluarsaaqqinnissanik sisamanik imaqarpoq.
Inuiaqataasut ilinniagaqarsimassusiat qaffassarneqassaaq. Siuariartorneq siuarsarneqassaaq arlalinnillu sammivilimmik aningaasaqarnermut allanngortsinneqassalluni. Pisortat ingerlataqarfiinik nutarterisoqassaaq, taavalu atugarissaarnermi pisartagarisat siunissamut qulakkeerneqassalutik.
