Kommune Kujalleq sakkortuumik isornartorsiorneqartoq

Kommune Kujalliup inunnik isumaginnittoqarfiani ingerlatsinerliortoqarnera kukkunersiuisutut suliffeqarfiup naalagaaffimmit akuerisat BDO-p nalunaarusiaani 2015-imeersumi allaaserineqarpoq.
Assi © : Kommune Kujalleq
maajip 26-at 2016 09:28
Nutserisoq Simon Uldum -

Pisortatigoortumimmi aqutsinermik nakkutilliinissaq annertuumik amigaatigineqarpoq, BDO ilaatigut taama inerniliivoq.

Suliffeqanngikkallarnermi ikiorsiissutinut tunngatillugu, suliat misissorneqartut affaanni kukkusumik akiliuteqartoqartarsimavoq. 

BDO-llu ukiuni arlaqalersuni aqutsisut nakkutilliinerisa amigaateqarneranik isornartorsiuisaraluartoq taama pisoqarpoq.

Aamma atuaruk Kujalleq meeqqanut tunngasuni ukiup affaani ikiussavaat

Utertoorutissat iluamik suliarineqarsimanngitsut

Suliffissaaleqisunut iliuusissat pillugit pilersaarutinut tunngatillugu, suliffissaaleqisut pillugit suliniutinut atatillugu kommunip Namminersorlutik Oqartussanit utertoorutissai aamma iluamik suliarineqarsimanngillat.

Piginnaanngorsaaqqinnissamut ikiorsiissutit tunngatillugu aamma suliat misissorneqartut affaanni kukkusumik akiliuteqartoqartarsimavoq.

Tamatumunnga peqatigitillugu piginnaanngorsaaqqinnissamut ikiorsiissutinut tunngatillugu kommuni 2015-ip qiteqqunnerani Namminersorlutik Oqartussanit 685.000 koruunit missaannik utertoorutissaqarsimavoq.

BDO-p kommuni toqqaannartumik kajumissaarpaa siusinaartumik soraarnerussutisiat pillugit suliat misissoqqullugit, 65-ileereersimasut, taamaattumillu utoqqalinersiutinik pisartagaqartussat, siusinnaartumik soraarnerussutisiassanik tunineqartarsimanerannut assersuutissaqarmat. Tamannalu inunnut ataasiakkaanut annertuumik sunniuteqarsinnaasoq BDO-p erseqqissaatigaa.

Kommuni aamma pisortanit ikiorsiissutinik tunniussinermi akiligassat ilanngullugit tamatigut naatsorsuisarsimanngilaq.

Aamma atuaruk Kommune kujalleq annertunerusumik ikiugassaavoq 

Suliani 15-ini 12-it kukkuneqartut

Erninermi ullormusianut tunngatillugu suliani misissorneqartunit  aqqaneq-marluusunit 15-ini kukkusumik akiliuteqartorsimavoq, erninissaq sioqqullugu akunnerit suliffiusut kukkusumik naatsorsorneqartarsimammata.

Akissarsisitsisarneq aamma iluarnerunngilaq. BDO allappoq kommunip akissarsiassanik aqutsinera naammaginanngitsumik ingerlaneqartoq, akissaatitigut isumaqatigiissutit malittarisassallu atuuttut malinneqarsimanngimmata.

Assersuutigalugu kommunimi atorfimmut nutaamut atatillugu aaqqiissuteqartoqarnerani 180.000 koruuninik akiliivallaartoqarsimavoq.

Aamma 2007-imi maajip qaammataanit kingumut atuutilersumik akissarsianut tapisiassanik akiliuteqartoqarsimavoq, naak tapisiassat akissarsiassat tunniunneqarnerinut atatillugu ingerlaavartumik akilerneqartaraluartut. Sulisoq pineqartoq taamaasilluni 300.000 koruuninik pissarsivallaarsimavoq.

Aamma elektroniskiusumik allagaataasiveqannginnera pissutigalugu kommunimi atorfeqarunnaarsimasunut suli akissarsititsisoqarsinnaasarpoq.

Akissarsianit ilanngaavigineqanngitsut

Aamma kommunalbestyrelsimut ilaasortat, BDO naapertorlugu, toqqakkatut inuiaqatigiinni suliassaqartitaaneq pissutigalugu akissarsiaminnit ilanngaanneqartariaqarsimagaluarnerannut assersuutissaqarpoq.

Kommunimi eqqaavilerineq anartaajaanerlu BDO-p aamma misissorsimavaa. Aaqqissuussinermut nalunaarsimasut, anartaajaanerit amerlassusaat, kikkunnut anartaajaasoqartarnera kommunimillu akiliuteqartussaasut aamma naapertuutinngillat.

Kukkunersiuinerup siunertaraa Kommune Kujallermi suleriaatsit nakkutilliinerillu pissusissamisoornersut toqqissimanarnerusullu nalilersuiffigissallugu misilerassallugillu. Aamma naatsorsuutitigut pissutsit kommunalbestyrelsip aningaasaliissutaanut, malittarisassanut inatsisinullu naapertuunnersut misissorneqarput.

Sulianili tamarluinnangajanni kukkunerit kukkunersiuisunit ukiut siuliini uparuarneqarsimapput, kommunimilli aaqqiissuteqarfigineqarsimanngillat.

BDO-p ilaannakortumik nalunaarusiaa misissugassanik tigooqqaanermik tunngaveqarpoq. Kommune Kujalliup ukiumoortumik naatsorsuutai BDO-p kukkunersioreerpagit kukkunersiuinermilu inaarutaasumik nalunaarummik tunniussaqareerpat ukiup naatsorsuuseriffiusup 2015-ip kukkunersiorneqarnera aatsaat naammassineqassaaq.