Meeqqat Illersuisuat: Ikiaroornartumik atornerluinerup meerartagut aamma eqqortarpai

Hashi pillugu KNR-imi radiukkut Oqalliffimmi oqallitsitsisoqarnerani, Meeqqat Illersuisuat peqataavoq. Ikiaroornartullu oqallisigineqarnera taassuma nuannaarutigaa. Aviâja Egede Lyngelli meeqqat inuusuttullu hashimik atornerluinermik aamma eqqorneqartartut erseqqissaatigaa.

- Inussuttuaqqanit inersimasuniillu ilaqutariinni atornerluisoqarnera pillugu oqaluttuarineqartunik arlalinnik tusarnikuuvunga, ilisimasaqarpungalu meeqqat allaat qulit aqqaneq-marlullu akornanni ukiullit ikiaroortarnerannik, Aviâja Egede Lynge tusagassiutinut nalunaarummi allappoq.

Hashimullu atornerluinernut suut pissutaanersut oqallisigineqarnissaa pingaaruteqartoq, Aviâja Egede Lynge isumaqarpoq.

Aamma atuaruk VIDEO Hashimik atuineq qaffakkiartortoq meeqqanut sunniuteqartarpoq

Hashimi misigisanut artornartunut nipaallisaatitut atortarsimallugu meeqqat inuusuttullu MIO-mut oqaluttuartarsimasut, Meeqqat Illersuisuata allaaseraa.

Angajoqqaallu tapersersuinissaat pingaaruteqartoq, 17-inik ukiullip MIO-mut oqaluttuaraa.

- Taama pisoqanngippat, inuttut ikorfartorneqannginneq misigineqarsinnaavoq naleqanngitsutullu misiginartarluni, 17-inik ukiulik oqarpoq.

Aviâja Egede Lyngep hashimik atornerluinerup pinaveersaartinneqarnissaata, ingammik meeqqanut inuusuttuaqqanullu tunngatillugu, oqallisigineqarnerunissaa neriuutigaa, meeqqallu inuusuttuaqqallu atornerluisooreersunut katsorsartinnissamut periarfissat qulakkeerneqarnissaat aamma kissaatigalugu.

Taassuma saniatigut Meeqqat Illersuisuata ikiaroornartoq, ikiaroornartup kingunerisartagai aammalu meeqqanik, inuusuttuaqqanik kiisalu inersimasunik katsorsaaneq pillugu paasissutissat nittartakkani www.katsorsaavik.gl aamma www.peqqik.gl.-miittut innersuuppai.