Kommune Kujalleq Qeqqata Kommunialu suleqatigiilerput
Qeqqata Kommunia Kommune Kujallerlu annertussusai eqqarsaatigalugit Nunatsinni kommunini minnerupput inuttakinnerpaallutillu.
Kommunit akunnerminni suleqatigiinnermut isumaqatigiissutigisaminni ilaatigut anguniarpaat meeqqat atuarfiinik pitsanngorsaaneq, tamatumani ilaatigut atuarfiup angerlarsimaffiullu suleqatigiinnerat ilinniartitsisunillu aqutsisunillu pikkorissaasarnerit pitsanngorsarnissai pineqarluni.
Sulisoqarneq eqqarsaatigalugu sulisut piginnaanngorsarnissaminnut periarfissaqarnissaat anguniarneqarput, soorlu misilittakkanik avitseqatigiinnikkut.
Kommune Kujalleq Qeqqata Kommunialu marluullutik aatsitassarsiorfiusut aatsitassanik piiaavinnik nutaanik pilersitsiviusussaammata aatsitassiornermi suliffeqarfinnik Namminersorlutillu Oqartussanik suleqateqarnikkut, IBA-mik isumaqatigiissutinik ingerlatsinikkut, siunissaq qaninnerusoq eqqarsaatigalugu misilittakkanik avitseqatigiinnissaq anguniarneqarpoq.
Kommunini innuttaasunik isumaginninneq eqqarsaatigalugu sulianik ingerlatseriaatsinik pitsanngorsaataasinnaasunik avitseqatigiinnissamut kommunit isumaqatigiissuteqarput, taamaasiornikkut isumaginninnikkut sullissineq ineriartortinneqassammat.
Aamma atuaruk Meeqqat angerlarsimaffiup avataanut inissinneqartartut amerliartorput
Angerlarsimaffiup avataanut inissinneqartartut amerlassusaanik killiliinissamut kiisalu angerlartitsinissamik, assersuutigalugu innarluutilinnik pingaartitsinerunissamik suleqatigiinneq, kommunit suleqatigiinnikkut anguniagaqarput.
Silaannakkut imaatigullu Islandimut angallannermut attaveqaatit kommunini ineriartortinneqarnissaat aamma samminiarneqarput.
