QIMMIT NAPPAATAAT Pinngitsaaliissummik kapineqartalernissaat siunnersuutigineqalerpoq
Pinngitsoorani akiuussutissamik kapitittalernissaannut oqallissaarut saqqummiunneqassaaq. Annertuumik aaqqissuussinissaq pisariaqassasoq isumassarsiatsialaanersoq tapersersorneqarusunnersorlu Naalakkersuisunut saqqummiunneqassaaq.
Uumasut nakorsaanerat Sanne Eline Wennerberg oqaluttuarpoq.
Aamma atuaruk Savissivimmi qimmit nappaalanerat virusimik aallaaveqarsimavoq
Aamma atuaruk Qimmit nappaataata Ilulissanut anngussimanissaa aarleqqutigineqartoq
Ilanngullugulu oqarluni suliaq aallartinneqareersoq, neriuutigiginilu ukiamut ataatsimiinnissamut inatsisissatut siunnersuutitut saqqummiunneqarnissaa.
- Taama nalunaaruteqarnerput qanoq pineqassanersoq taamanikkussamut takujumaarparput.
Qimmip nappaataata malunniutai
Virusi timip ipiutaasartai tamaasa siammarfigigaangamigit nappaat malunniutilersarpoq. Qimmeq ullut pingasut angullugit 39,5-40,5 gradinik kissarneqalersarpoq.
Kingorna kissarneerukkiartortarpoq, nalinginnaasumik kissarneqalersarluni. Ullut marluk qaangiukkaangata kissarneqaqqilersarpoq, bakteriat napparsimalersitsisuullutik.
Uku malunniutaasinnaallutik:
- Nerisassanik nakerisaqannginneq
- Isinit qingamillu qorsuppaluttumik seerineq
- Meriarneq timminnerlu
- Panertoorneq
- Quersorneq/ bronkitis/puallunneq
- Isigai sigguilu issutsinneri
Naalakkersuisut
Qimmillit ullutsinni akisussaaffigaat qimmimik akiuussutissamik kapineqarnissaannut aningaasartuuteqarusunnerlutik. Amerlanngitsut taama pisarput qimmillu amerlasuut toqorarnerannik tamanna kinguneqartarpoq.
Uumasut nakorsaat oqaluttuarpoq qimmillit ilisimatinneqartuartartut qimmiaraatimik akiuussutissamik kapineqarnissaat qanoq pingaaruteqartigisoq. Qimmiaqqat illersorniarlugit naliginnaasumik ukiorpassuarni tamanna ilitsersuutigineqartartoq ajornartorsiutaajuarpoq.
- Qimmillit akiuussutissaq namminneq sumiiffimminni teknikkeqarfimmut pisiniarfimmulluunnit piniartartussaavaat. Aammali uanga aqqutigalunga piniarsinnaagaluarlugu taamaaliortartut amerlanngillat.
Qimmilli nappaalasarnerat nutaajunngilluinnarpoq.
- Nappaat taanna Qaanaami Savissivimmilu atugaanikuuvoq. Nappaallu taannarpiaq illoqarfinni nunaqarfinnilu allani aamma atugaasarsimavoq.
Aamma atuaruk Qimmillit akiuussummik kapisinissaq soqutiginngilaat
Aamma atuaruk KNQK: Qimussertarneq attatiinnarusupparput
Peqqutaa tassaavoq nappaatip taassuma nunap matuma silaata pissusaa iluarimmagu. Ilanngullugulu erseqqissarlugu qimmeqariaaserput nappaalalersitsinissamut qanititsisoq.
- Qimminik qimmiaqqanillu pitussimanngittunik angalasoqartarpoq, aammalu nappaammut akiuussutissamik kapuuinissaq pinngitsaaliissutaanngimmat, inuttaasullu akiuussutissaq nammineq piniarlugulu nammineq akilertussaammagu, uumasut nakorsaanerat oqarpoq.