Københavns Universitet: Ilinniartukitsumik ingerlatsineq akisuvoq

Danmarkimili naalakkersuisut tamatumunnga akisussaasuusut, universitetip immikkoortortani pisortap tullia isumaqarpoq. 

- Ilinniarfimmit mikinerpaat taamakkallartillugu imminnut akilersinnaanngillat, humanioramut immikkortortami ilinniartitaanermut pisortap tullia, Jens Erik Mortensen, oqarpoq.

Humaniora tassaavoq, inuup kulturimik oqaatsinik allanillu pilersitsisartuunera pillugu ilisimatusarneq, tassalu inuiaat inuit issittorlugu pillugit Københavnimi ilisimatusarneq tamatuma ataaniippoq.

Universiteti 2016-mi 300 millionit kruuninik sipaartussaavoq.

Aamma atuaruk Atorfilittaq: Issittoq Danmarkip nunanut allanut tunngasunut politikkianut ilaatinneqarnerusariaqarpoq

Danmarkimilu universitetit ilinniartumik naammassisut amerlassusaat aallaavigalugu akilerneqartarmata, inuiaat inuit pillugit ilinniagaq ilinniakkallu allat aqqaneq marluk imminnut akilersinnaanngitsut. Pisortap tullia oqarpoq.

- Ilinniarfimmik ingerlatsineq akisuupilussuuvoq. Inuiaat inuit pillugit ilinniakkami atualertut kingulliit 15-iupput. Naalakkersuisut millilerinerat malitsigalugu ilinniartut 2018-ip tungaanut qulingiluaannanngussapput.

- Tamatuma peqatigisaanik ilinniartut 60 priocentingajai taamaatiinnartarput. Tassalu ilinniartukeqimmat isertitat aningaasartuutillu imminnut naapertuutsissinnaanngilagut, Jens Erik Mogensen oqarpoq.

Aamma atuaruk Inuiaat inuit pillugit ukioq manna ilinnialertoqassangilaq

Taassumali erseqqissarpaa, ilinniarfimmik matusivinnissamik aalajangiisoqanngimmat. Ukioq manna ilinnialertoqannginnissaa eqqarsarfiussaaq.

- Pissutsit sukumiinerusumik misissoqqissaartariaqaratsigit eqqarsarfissittariaqarpugut. Aamma ilinniarfiit qanoq ittuunissaannut iliuusisssiortariaqaratta. Assersuutigalugu ilinniakkat soorliit ataatsimoortilissanerivut, Jens Erik Mogensen oqarpoq. 

Taanna aperaarput, ilinniarfiit aalajangersimasut ataatiinnarnissaannut inuiaqatigiit pisussaaffeqannginnersut, aammaluunniit ilinniartukikkaluarpata?

- Taamaassasorinaraluarpoq. Taamaammanuna isumaqartugut, oqaatsit universitetini ilinnarneqarsinnaasut assigiingisitaarluartut suli neqeroorutigisinnaanissaannut naalakkersuisut iliuusissatut pilersaaarusiortariaqartut, humanioramut immikkortortami ilinniartitaanermut pisortap tullia, Jens Erik Mortensen, oqarpoq.