Issittoq pillugit ilisimatusarnerit annikillivigineqarnissaat ilisimatuut mianersoqqussutigaat
- Nunat assigiinngitsut Issittoq pillugu piginnaasatik piorsarlugillu ilisimasatik annertusarpaat, tamaani pisuussutitik illersorniarlugit taamaaliorlutik, immakkummi angallannerup annertusiartornera, silallu pissusiata allanngoriartornera eqqarsaatigalugu taamaaliorput, Eskimologimut lektori Frank Sejersen Informationimut taama oqarpoq.
Kalaallit Nunaanni oqaatsit, kulturi, inuiaqatigiinnullu tunngasunik ilisimasarpassuit Danmarkip Kalaallit Nunaannut ukiuni hunnorujulikkaani attaveqarneratigut katersorneqarsimanerat taassuma tikkuartorpaa, Issittorlu pillugu ilisimatusarnerup annikilliisaaviginiarneqarnera apeqquserlugu.
- Annertuumik annaasaqarnerussaaq, Frank Sejersen oqarpoq.
Aamma atuaruk Inuiaat inuit pillugit ukioq manna ilinnialertoqassangilaq
Issittumi suliniutit pillugit ukiuni tulliuttuni 7000 milliardit koruunit missaannik aningaasaliisoqarniartoq, aningaasaliisartoqatigiit Guggenheim Partnersikkut siorna oktobarimi oqaatigaat.
- Issittoq pillugu ilisimasat annertusarneqarnissaannut tamanna pisussaaffiliivoq, Ellen Arnskjold, Arctic Business Networkimeersoq oqarpoq.
- Suliffeqarfigut Issittoq pillugu annerusumik ilisimatusarsinnaallutillu ilinniarsinnaasariaqarput, Københavnip Universitetiata Issittoq pillugu ilisimatusarfimmi ilinniarniartunik ukioq manna tigusaqarniannginnera ajuusaarnarpoq, Ellen Arnskjold Informationimut oqarpoq.
Aamma atuaruk Ilinniartut Issittoq pillugu ilisimasat eqqumaffiginerulerniarlugit oqallittarfiliorput
- Issittup politikkikkut inuussutissarsiutitigullu sammineqarnerujussua eqqarsaatigalugu taama iliuuseqarneq pissusissamisuunngilaq, Ellen Arnskjold oqarpoq.
/ritzau/