PITUFFIK Eqqartuussisuserisup misissuinera: Hammond nunanullu allanut tunngasunut pisortaqarfik takkuitsuuipput

NUTARTIGAQ 15/1-16 Aleqa Hammond naalakkersuisunut siulittaasuutilluni aamma Nunanut allanut pisortaqarfik piffissaagallartillugu iliuuseqarsimanngitsut Pituffimmik suliaq pillugu nalunaarusiami qulaarneqarpoq.
januaarip 14-at 2016 15:44

Thule Air Basemi kiffartuussinissamik isumaqatigiissutip annaaneqarneranut tunngatillugu suliap ingerlanneqarsimaneranik eqqartuussissuserisup misissuisimaneranut atatillugu KNR-ip allagaatinik takunnikkumalluni qinnuteqaateqarneratigut tamanna paasinarsivoq.

Pituffimmi kiffartuussinissamik isumaqatigiissutip suliariumannittussarsiuunneqarnerani malittarisassat allanngornerisa qanoq sunniuteqarsinnaanerat pingaartumik Nunanut allanut pisortaqarfimmi atorfilittanit arajutsineqarsimapput.

Aamma Nunanut allanut pisortaqarfik tassaavoq suliariumannittussarsiuussinermi malittarisassanik nutaanik Nunarput sinnerlugu akuersisuusoq, tamannalu tunngavigalugu kiffartuussinissamik isumaqatigiissut amerikamiut ingerlateqatigiiffiannut Exelis Servicesimit tunniunneqarsinnaanngorpoq. Suliamilu tassani Aleqa Hammond akuutinneqarsimanngilaq.

Aleqa Hammondili aamma isornartorsiorneqarpoq. Suliap ingerlanneqarnerani siusissukkut suliaq tamakkerlugu atorfilittanut suliassanngortissimavaa, taakkulu ima inerniliisimapput:

- … Aleqa Hammondip malittarisassanik suliaqarneq politikkimut tunngassuteqarsorinngilaa, (...) allaffissornikkullu suliassatut aallaavittut isigalugu.

Allatut oqaatigalugu, suliaq pilermat iliuuseqarsimanngilaq akisussaaffillu atorfilittaminut tunniussimallugu.
Tamanna eqqartuussissuserisup suliap ingerlanneqarneranik misissuinerani pingaarnertut inerniliussat ilagaat.

AAMMA ATUARUK Pituffimmi kiffartuussinissamik isumaqatigiissutip annaaneqarnera

Eqqartuussissuserisup Ole Spiermannip inerniliinera naapertorlugu aamma akissut Namminersorlutik Oqartussat danskit nunanut allanut ministeriaqarfiannut nassiussaat Naalakkersuisunit tamarmiusunit akuersissutigineqartussanngorlugu aamma saqqummiunneqarsimasariaqaraluarpoq.

Atorfilittat tungaannit kukkuluttortoqarsimannginneranik nalunaarusiaq aamma inerniliivoq.

 

2013-imi ulloq unnuarlu pingaarutilinnik pisoqarfiusoq

2013-imi novembarip qaammataani ullut pisoqarfiulluartut nalunaarusiami allaaserineqarput. Namminersorlutik Oqartussat malittarisassanut siunnersuummik danskit nunanut allanut ministereqarfiannut novembarip 15-iani nassiussaqarpoq. Ullut pingasut qaangiummata nunanut allanut ministereqarfik akissuteqarluni siunnersuummik allamik nassiussivoq. Ingerlatseqatigiiffiullu Exelis Servicesitut ittup isumaqatigiissummut neqeroorsinnaanngorneranut allannguutinik matumani pisoqarsimavoq.

Kukkunerlu pingaarutilik tamatumani pisoq nalunaarusiami ima allaaserineqarpoq:

- 2013-imi novembarip 15-iata kingorna suliap ingerlanneqarnerani isumaqarnarpoq piumasaqaatini allannguutit Namminersorlutik Oqartussat novembarip 15-iani siunnersuutaanut naleqqiullugit qanoq kinguneqartitsisinnaanersut Nunanut allanut pisortaqarfimmi atorfilittat akuusut takusinnaasimanngikkaat. Taamaammat atorfilittat suliap politikkimut tunngasortaa aamma takusinnaasimarpasinngilaat.

Kingornalu ima allaqqasoqarpoq:

- Inatsisitigut erseqqissumik kukkusoqarsimanera inerniliunneqarpoq, piumaqaatit inaarutaasut politikkikkut akuerisassanngorlugit saqqummiunneqarsimanngimmata imaluunniit Naalakkersuisut sinnerlugit akuerineqarsimanngimmata.