Schweizimiut Kangilinnguani nunalerinermik ilinniarfimmik suli pilersitserusuttut
Kangilinnguanilli soqutiginnittut allat assingalugit Illersornissaqarfiup sakkutooqarfiusimasumi saliinissamut isaterinissamullu suliarimannittussarsiuussinera pissutigalugu suliniaqatigiiffik susinnaajunnaaqqagallarpoq.
Suliniaqatigiiffik Kangilinnguani nunalerinermik ilinniarfimmik pilersitsinissani ukioq ataaseq sinnerlugu sulissutigisimagaa, Malik Lynge Papis Nunatsinni 3HF-imik sullissisuusoq taama oqaluttuarpoq.
- Sakkutooqarfiusimasup nunalerinermik ilinniarfittut bootcampeqartillugu lejrskoleqartillugulu ingerlateqqinnissaa kissaatigigaluarparput.
Inuusuttunullu piffissap ilaani sussaaleqisartunut piukkunnarluinnartoq, Malik Lynge Papis isumaqarpoq.
- Nalunngilarput inuusuttorpassuit pingaartumik aasaanerani atuanngiffeqarnerminni susassaaleqisartut. Taakkulu piujuaannartitsinissamik minguitsumillu nukissiuuteqarnermik ilinniartikkusuppagut. Nunarput ukiup ilarujussuani naatitanik imminut pilersorsinnaavoq, Kangilinnguillu nunaavoq naggorittupilussuaq.
AAMMA ATUARUK Schweizimiut Kangilinnguani nunalerinermik ilinniarfiliulersaartut
Kangilinnguanilli allaanerusumik atuerusuttut assingalugit suliniaqatigiiffiup suliniutaa Illersornissaqarfiup Kangilinnguani avatangiisinik sukumiisumik saliinissamik illuutinillu isaterinissamik suliariumannittussarsiuussineranit unittooqqatinneqarpoq.
Tamannalu allanngortinneqartariaqartoq 3HF allallu 500-t suliarimannittussarsiuussinermut akerliullutik atsiorsimasut isumaqarput.
Taarsiullugu Illersornissaqarfiup avatangiisinik saliineq nammineerluni isumagisariaqaraluarpaa illuutillu tuniniarlugit, 3HF taama isumaqarpoq.
Taamatulli oqariartuuteqartoqarnera maannamut tusaaniarneqarsimanngilaq:
- Politikerit paasitinniarnissaat uatsinnut ajornakusoornerpaavoq. Christiansborgimi politikerit tamarluinnaasa allagaqarfigaagut aammalu Nunatsinni naalakkersuisut arlallit oqaloqatigalugit, tusarfiginerli-ajorpagut.
Taamaakkaluartoq Nunatsinni politikerit iliuuseqarnissaat 3HF-imit neriuutigineqarpoq:
- Nunatsinni politikerit danskit politikeriinut nipituuliorsinnaanissaat neriuutigigaluarparput. Naalagaaffimmi maannakkorpiaq akisussaasuuvoq. Danskilli politikerii nunasiaateqartutut isigineqarusunnginnamik Nunatsinni qanoq pisoqarnissaanik aalajangeerusunngillat. Taamaammat Nunatsinni politikerit tassaapput danskit politikeriinut nipituuliorlutik ima oqartussat: Pitsaasumik angusaqarfigisinnaasariaqarparput.
3HF Namminersorlutik Oqartussanit naalagaaffimmiillu aningaasalersorneqarani nunalerinermik ilinniarfimmik ingerlatserusuppoq, aningaasallu ilaatigut EU-p OLT-mik aaqqissuussineranit aammalu aningaasaateqarfinnit namminersortunit pissarsiarineqassasut, suliniaqatigiiffiup ilisimatitsissutigaa.
