Aajap danskit aningaasaqarnermut naalakkersuisuannik kiisami ataatsimeeqateqalersoq
Inuit Ataqatigiinneersup folketingimut ilaasortap Aaja Chemnitz Larsenip Danmarkimi aningaasanut inatsisip naammassineqareernerani aatsaat danskit aningaasaqarnermut naalakkersuisuannit Claus Hjort Frederiksenimit (V) ataatsimeeqatigineqarnissaminut piffissaqarfigineqalernini iluarinngilaa.
- Aningaasaqarnermut naalakkersuisumit ataatsimiigiaqquneqarnissara pillugu nalunaarutisigama, soorunami qilanaarpunga.
- Piumasaqaatigissamaakkama ilagaat kalaallit ilinniariarsimasut ukkatarineqarnerunissaat, Danmarkimi inooqataaniarnikkut ajornartorsiuteqartut kommunefogedillu, Aaja Chemnitz Larsen KNR-imut oqarpoq.
Aaja Chemnitz Larsenip piumasaqaatimini aningaasalersorneqarnissaannuyt periarfissaqarnissaa isumalluarfiginerarpaa.
- Oqaloqatigiinneruvormi. Arlaannut aningaasaliiniaraangatta ujarleqqaartariaqartarpugut, aningaasaqarnermullu naalakkersuisup oqaloqatiginissaa utaqqimaaqqaartariaqarpara, suut iluatsissinnaanersut takujumallugit.
- Saqqummiussakkalu pingasut tigussaasorujussuupput, Aaja Chemnitz Larsen oqarpoq.
Danmarkimi naalakkersuisut Venstrenit aqunneqartut, Dansk Folkeparti Konservativit, Liberal Alliancelu peqatigalugit 2016-mut aningaasanut inatsisissaq inissippaat, Aaja Chemnitz Larsen (Inuit Ataqatigiit) aamma Aleqa Hammond (S) isumaqatigiinniarnernut qaaqquneqarsimanngillat.