Berlingske: Danmark iliuuseqartariaqarpoq
- Naalakkersuisut isumaginninnermullu ministerip pissutsit sumi ajornerpaanersut paasisariaqarpaat, assersuutigalugulu meeqqat pillugit suliniaqatigiiffiit ikiuisinnaanerat qulakkeerlugu. Kalaallit oqartussaasui peqataatillugit, pisariaqassappallu peqataatinnagit, aviisi taama allaaserisaqarpoq.
Isumaginninnermut suliassaqarfimmut Nunatta nammineq akisussaaffeqarnera danskit politikeriinut Nunatta tungaanit erseqqissaatigineqaraluartoq aviisi taama allappoq. Aammattaaq oqartussaasut tungaannit oqaatigineqareeraluarpoq pissutsit, pingaartumillu Qaasuitsup Kommuniani pissutsit isornartorsiorneqartut, iluarsiivigineqarnissaannik suliniuteqartoqareersoq.
AAMMA ATUARUK Meeqqat Illersuisuata isornartorsiuineq akerlilerpaa
Ikiorneqarnissamulli qujaannarneq kukkunerusoq, aviisi Berlingske allappoq.
- Kalaallit nakimaannerat namminersulivinnissaallu, meerarpassuit sumiginnagaanerannit angajoqqaanit imerajuttunit oqartussaasunillu piukkunnaateqanngitsunit akisussaaffigineqartoq pingaarnerorpasipput.
Aamma atuaruk Meeqqat Illersuisuat: Meeqqat pisinnaatitaaffii unioqqutinneqarput
Aviisi naapertorlugu Danmark iliuuseqarnissaminut inatsisitigut pisussaaffeqarpoq, Naalagaaffeqatigiit sinnerlugit Naalagaaffiit Peqatigiit Meeqqat pillugit isumaqatigiissutaa atsiorsimammagu. Akisussaaffilli taanna danskit politikeriisa tigujumanngilaat, aviisi taama isumaqarpoq.
- Kalaallit meeqqat nunat ineriartortitat ilaanni pissutsinit ajornerusunik atugaqartinneqaraluartut, danskit politikeriisa kalaallit narrujuummertikkumanagit meeqqat sumiginnakkat, Danmarkimi innuttaassuuseqarlutillu danskinit akisussaaffigineqartut iliuuseqarfigiumanngilaat.
