Martha Lund Olsen meeqqat pillugit nassuiaateqartussanngortoq
Ilaqutariinnermut, naligiissitaanermut isumaginninnermullu naalakkersuisoq, Martha Lund Olsen, Folketingip Kalaallit Nunaannut tunngasunut ataatsimiititaliaanit ualeru ataatsimiinnissamut aggersarneqarpoq.
Meeqqat inuusuttullu, pingaartumik Qaasuitsup Kommunia, atugaqartitaanerisa sakkortuumik isornartorsiorneqarnerat, Nunatsinni Meeqqat Illersuisuata Naalaaffiit Peqatigiit Meeqqat pillugit isumaqatigiissutaannik unioqqutitsinertut taaneqartoq ataatsimiinnermi nassuiaateqarfigissavaa.
AAMMA ATUARUK Meeqqat sumiginnakkat pillugit ministeriuneq akuleruteqquneqartoq
Danmarkilu Namminersorlutik Oqartussat suleqatigalugit iliuuseqaratarsinnaavoq. De Radikalet Kalaallit Nunaannut tunngasunut oqaaseqatartuat, Martin Lidegaard, Danmarkip Radioanut taama oqarpoq.
Ilaatigut Danmarkip Naalagaaffeqatigiinnerup iluani meeqqat pisinnaatitaaffiisa illersorneqarnissaat pillugu Naalagaaffiit Peqatigiinnut inatsisitigut pituttugaanera tamatumani pissutaasoq, Martin Lidegaard taama isumaqarpoq:
- Imatut oqaatigerusuppara, danskit naalakkersuisui Kalaallit Nunaannut ikiuinissamik neqerooruteqassanngippata, taava neriuutigaara Folketingimi amerlanerussuteqartut danskit naalakkersuisuisa taamaaliornissaannut kimigiiserfigissagaat.
Danmarkip Nunatsinni isumaginninnermut suliassaqarfimmut aningaasatigut ikiorsiissuteqarsinnaanera Martin Lidegaardip tunuartivissunngilaa, naak sulissaqarfik pineqartoq Kalaallit Nunaata nammineerluni akisussaaffigigaluaraa.
Aamma atuaruk Aaja: Kalaallit meerartai ikiorniarlugit danskit aningaasaliissagaluarput
Danskit isumaginninnermut ministeriata Danmarkip Radioanut oqaatigaa Danmarkip Kalaallit Nunaatalu akornanni suleqatigiinneq nukittooq pioreersoq, meeqqanillu sumiginnaasarnermik kinguaassiuutitigullu atornerluisarnermik ajornartorsiutit qaangerniarnissaannut kalaallit naalakkersuisui sapinngisartik tamaat suliniuteqartut.
Danmarkimiilli annertunerusumik ikiuisoqarnissaanik pisariaqartitsisoqarsinnaanera aamma tunuartinngilaa.
- Matumani suliassap naammassineqarnissaanut danskit tungaannit sutigut ikiuinissamik pisariaqartitsisoqarnera pillugu Kalaallit Nunaannik oqaloqateqarnissara piareersimaffigaara. Naalagaaffeqatigiippugummi, aamma Naalagaaffiit Peqatigiit Meeqqat pillugit isumaqatigiissutaat danskinit atsiorneqarnerani tamanna Kalaallit Nunaat sinnerlugu aamma iliorneruvoq.
Aamma atuaruk Søren Espersenip siunnersuutaa Martha Lund Olsenip akuerinngilaa
